"თუ გინდათ ადამიანი გაიხსნას, ცოტა დრო უნდა დაუთმოთ. როცა ახალგაზრდა ვიყავი და სხვადასვხა ქვეყანაში დავდიოდი, მაშინ განსხვავებული შეკითხვებიც იყო, ახლა ყველა ქვეყანაში კითხვები და ყველაფერი ერთმანეთს ჰგავს", - აღნიშნა რეჟისორმა.

ლეო კარაქსმა პრესკონფერენციაზე თავის შემოქმედებაზე, მუზაზე და კინოს შესახებ ისაუბრა. რეჟისორის პასუხებს დასმულ შეკითხვებზე "ჯი-ეიჩ-ენი" უცვლელად გთავაზობთ:

- გაქვთ თუ არა ნანახი ქართული ფილმი?

- ფილმებს დიდი ხანია არ ვუყურებ. 17-იდან 24 წლამდე ხშირად დავდიოდი კინოში და ვუყურებდი ფილმებს. ნანახი მაქვს ფარაჯანოვის ნამუშევარიც. ახლა, ჩემს გადაღებულ ფილმებსაც აღარ ვუყურებ.

- სანამ საქართველოში ჩამოხვიდოდით, ახალი ფილმის გადაღება დაასრულეთ. თამაშობს თუ არა მასში დენი ლავანი, რომელიც თქვენს ყველა ფილმში მონაწილეობს?

- 10 დღეა, დავამთავრე ბოლო ფილმი, რომლის გადაღების პროცესს არ ვუყურებდი კამერაში. მონტაჟის დროს მივხვდები, რა გამომივიდა. მასში დენი ლავანი თამაშობს. ის აკრობატისტი და მსახიობია. რაც პირველ კასტინგზე დენი ლავანი აღმოვაჩინე, მას შემდეგ ნამდვილი კასტინგი აღარ ჩამიტარებია. მასთან ერთად ყოველთვის მონაწილეობდნენ ჩემი შეყვარებულები, თუმცა ბოლო ფილმში ჯულიეტ ბინოში ვერ ვათამაშე, რადგან საკუთარი პრომოუშენი გამომდიოდა.

- თქვენი ყველა ფილმი საზოგადოების განხილვის თემა ხდება, მაგალითად, "ცუდი სისხლი", რომელიც ჟან-ლუკ გოდარს მიუძღვენით. ამ ფილმმა მაყურებლის ნაწილი აღაშფოთა. რამდენად მისაღებია კრიტიკა?

- სულ 5 ფილმი მაქვს გადაღებული. ძალიან პატარა პუბლიკა მყავს. როცა მათი აზრი ორად იყოფა, მიხარია და თან მიკვირს. უნდა იყოს სხვადასხვა აზრი. ბოლოს საფრანგეთში ფილმის გადაღებას აღარ მინდოდა, თუმცა სცენარი რომ დავწერე, მივხვდი - ეს ფილმი აქ უნდა გადამეღო. თავს რეჟისორად არ მივიჩნევ. ყოველი ფილმის ნახვის შემდეგ მრჩება შეგრძნება, რომ თვალთმაქცი ვარ.

- ძალიან ცოტა ფილმი გაქვთ გადაღებული. საკმარისი შემოსავალი გაქვთ?

- ცოტა ფილმი მაქვს და შესაბამისად ანაზღაურებაც საშუალოა. როდესაც ფილმზე არ ვმუშაობ, მაშინ ან ჩემი შეყვარებულია მდიდარი, ან ფულს ვსესხულობ ხოლმე.

- სცენარს თავად წერთ და მსახიობებიც წინასწარ შერჩეული გყავთ. რა მნიშვნელობა აქვს ფერს თქვენს ფილმებში?

- დღეს, სამწუხაროდ, გადაღებები ციფრულით ხდება და ფერებმაც მნიშვნელობა დაკარგა. მე მხოლოდ ერთი ფილმი მაქვს შავ-თეთრი, დანარჩენი ყველა ფერადია, მაგრამ, ვფიქრობ, რომ ახლა უკვე ფერები მნიშვნელობას კარგავს.

- რას ურჩევთ ახალგაზრდა კინორეჟისორებს?

- ყველა ჩვენთაგანმა უნდა გაიაზროს არის თუ არა კინო სამყარო. 17 წლისა მივხვდი, რომ ეს ჩემი სამყარო იყო. ეს არა მარტო კინოში ხდება, არამედ მუსიკაში, ხატვაში. ყველა ხელოვანი უნდა მიხვდეს, არის თუ არა ეს მისი სამყარო. რჩევას ვერავის მივცემ, ეს შენში უნდა იყოს.

- ჩამოხვალთ ისევ საქართველოში?

- სიამოვნებით, თუ საშუალება იქნება.

შეგახსენებთ, რომ ფრანგი რეჟისორის, ლეო კარაქსის ვიზიტი თბილისის მე-12 საერთაშორისო კინოფესტივალის ფარგლებში მოეწყო.