ახალგაზრდა იურისტთა ასოციაციის შეფასებით, საარჩევნო კოდექსის პროექტში ვენეციის კომისიის რეკომენდაციების შემდეგ შესულ ცვლილებებში დიდი პროგრესი არ შეიმჩნევა. ამის შესახებ საიას წარმომადგენლებმა პარლამენტში იურიდიულ საკითხთა კომიტეტის თავმჯდომარე პავლე კუბლაშვილის მიერ გამართული პრეზენტაციის შეჯამებისას განაცხადეს.
საიას წარმომადგენლების განცხადებით, ცვლილებებში გათვალისწინებულია მხოლოდ 4 რეკომენდაცია. კერძოდ, ფოტო- და ვიდეოგადაღების უფლება კენჭისყრის შენობაში, გარდა კენჭისყრის კაბინისა; აგიტაციის ცნების განსაზღვრის აუცილებლობა; შემოწირულობის განხორციელების აკრძალვა ისეთი სამეწარმეო იურიდიული პირისგან, რომელშიც არსებობს სახელმწიფოს წილი; დამკვირვებლებისა და მასობრივი საინფორმაციო საშუალებების მიერ წესრიგის დარღვევის შემთხვევაში მათი გაძევების უფლება.
შესაბამისად, აღნიშნული რეკომენდაციების გათვალისწინებას არასამთავრობოები დიდ პროგრესად არ მიჩნევენ.
არასამთავრობო სექტორის წარმომადგენლები იმედოვნებენ, რომ მომავალში დაგეგმილი განხილვების დროს, პროექტში ისეთი არსებითად მნიშვნელოვანი რეკომენდაციები იქნება გათვალისწინებული, როგორიცაა ადმინისტრაციულ რესურსებთან დაკავშირებული, დავებთან დაკავშირებული ორაზროვანი დებულებების არსებობა და სხვა.
საარჩევნო კოდექსში ცვლილებების განხილვა საპარლამენტო კომიტეტებში 13 დეკემბერს მოხდება.
