საპარლამენტო უმრავლესობის ერთ-ერთი ლიდერი გოკა გაბაშვილის განცხადებით, ეროსი კიწმარიშვილის ავანტიურისტული სტილი საყოველთაოდ ცნობილია, მაგრამ, მართლა ყოველნაირ ზღვარს ცდება ღობეზე ძრომიალი და სადღაც შევარდნა.
~მეორე მხრივ, ცხადია, დავა არის ფულზე და მეტი ფულის დატოვების, განაწილების სურვილზე. ასე, რომ მმართველებისა და მფლობელების მხრივ მართლა სამარცხვინო კამპანიაა, თან თითის სხვაგან გაშვერით და თავისი პრობლემების სხვისთვის გადაბრალებით. ეს არის მათი დავა, მათ ფულზე, მათ წილებზე, ეს დავა ისე უნდა გადაწყვიტონ, რომ საკუთარი თავი არ შეირცხვინონ~, - აღნიშნა ჟურნალისტებთან საუბარში გოკა გაბაშვილმა.
მისივე შეფასებით, ეროსი კიწმარიშვილმაც უნდა ისწავლოს თავის ფულისა და უფლებების ისე დაცვა, რომ არ დააზარალოს პროცესი და ეს უნდა ისწავლოს სხვამაც, ანუ ორივე მხარემ პატივი უნდა სცეს ტელევიზიის შემადგენლობასა და კოლექტივს.
გოკა გაბაშვილი მიიჩნევს, რომ იმ ფორმით, რა ფორმითაც მიმდინარეობს გარჩევა, ეს არის სუფთა ავანტიურისტული კონფლიქტი ფულის გამო, ღობეზე გადაძრომით, საჯაროდ, წილებზე და ფულზე ჟივილ-ხივილით, რითაც ზარალდება მხოლოდ მაუწყებლობა და ჟურნალისტები.
~პოლიტიკური ტიპაჟები ამ ტელევიზიას პოლიტიკური მიზნებისთვის იყენებდნენ ადრეც და ამას აპირებენ მომავალშიც, თან ამაში უნდათ ფული იშოვონ. ფულის გაყოფაზე და განაწილებაზე არის საუბარი როგორც კიწმარიშვილის მხრიდან, რომელიც თუ ფულზე მიდგება საქმე ნებისმიერ ღობეზეა ამძრომი, ასევევ საპირისპირო მხრიდან. ეს სამარცხვინო დავა არ უნდა გადაიტანონ ჟურნალისტებზე, თან სხვის მიმართ სამარცხვინო ბრალდებით, რომ ვითომ მილიონებზე დავა სხვას ეხება. ეს არის მათი გასანაწილებელი მილიონები, მათი პარტნიორებისა და მათი პოლიტიკური დამფინანსებლების, ადრე ეს იყო ~ქართული პარტია~ და გოგელია, მომავლაში ვინ იქნება თავად იციან. ისე გაიყონ ის ფული, რომ თავსაც ნუ შეირცხვენენ, ტელეკომპანიასაც ნუ შეარცხვენენ და საზოგადოებასაც ასეთი ცირკის ყურების საშუალებას ნუ მისცემენ~ - განაცხადა გოკა გაბაშვილმა.
