დღეს, 1-ელ დეკემბერს, 11:00 საათზე, აშშ-ის ელჩი საქართველოში ჯონ ბასი გორში (სტალინის 7) დემოკრატიული ჩართულობის ცენტრს გახსნის. პირველი დისკუსიისას, ელჩი ბასი, გორის საზოგადოებასთან ერთად, გორში საბავშვო ბაღების დახურვის საკითხს განიხილავს.
დემოკრატიული ჩართულობის ცენტრს ამერიკის მთავრობა აფინანსებს. გორის ცენტრი ერთ-ერთია იმ ათ ცენტრთაგან, რომელიც საქართველოს სხვადასხვა ქალაქებში გაიხსნება და საზოგადოებას საჭირბოროტო საკითხების განხილვისათვის ხელსაყრელ ადგილს შესთავაზებს. დიალოგის ხელშეწყობის პროცესი მიზნად ისახავს მოქალაქეთა სამოქალაქო აქტიურობის წახალისებასა და გამჭვირვალეობის გაუმჯობესებას. დემოკრატიული ჩართულობის ცენტრებისთვის შენობები დაიქირავა და ტექნიკურად გამართა ამერიკის საერთაშორისო განვითარების სააგენტომ (USAID). ამერიკის მთავრობა ოზურგეთში, ქუთაისში, თელავში, გორში, ზუგდიდში, ბათუმში, ახალციხეში, რუსთავში, მარნეულსა და გურჯაანში დემოკრატიული ჩართულობის ცენტრებს 5 მილიონი დოლარით დააფინანსებს.
თითოეულ ცენტრს ექნება ბიბლიოთეკა და ინტერნეტი, რაც ადგილობრივ საზოგადოებას დაეხმარება, შეუფერხებლად გადაჭრან პრობლემური საკითხები. ცენტრების თანამშრომლები ყოველ თვეს, სულ ცოტა, ორ შეხვერას გამართავენ სხვადასხვა საკითხებზე, მოიწვევენ პოლიტიკური პარტიების წევრებსა და არჩეულ ოფიციალურ პირებს და დაეხმარებიან მათ მოსახლეობასთან შეხვედრების ორგანიზებაში, განსაკუთრებით 2012 და 2013 წლების არჩევნებისათვის მოსამზადებელ პერიოდში. სამოქალაქო ორგანიზაციებს, პოლიტიკური პარტიების წევრებსა და დამოუკიდებელ ჟურნალისტებს შეეძლებათ, დემოკრატიული ჩართულობის ცენტრები უსასყიდლოდ გამოიყენონ.
ცენტრების მეშვეობით აშშ მთავრობა ეხმარება ქართველ ხალხს, უფრო აქტიურად ჩაებას ქვეყნის დემოკრატიის აღმშენებლობაში.
