გაზეთ "რეზონანსის" რედაქტორი ელისო ჩაფიძე ბიზნესმენებს მოუწოდებს რომ არ მიიღონ მონაწილეობა აუქციონში, რომელიც ათასი ჯიხურის პროექტის ფარგლებში არის დაგეგმილი.
როგორც მერიასთან გამართულ აქციაზე ელისო ჩაფიძემ ჟურნალისტებთან საუბრისას განაცხადა, თბილისს სჭირდება გაზეთი და აუცილებელია, რომ ხალხს ის მიეწოდოს.
"დღევანდელი აქციით ჩვენ გვინდა თბილისის მერს და საქართველოს ხელისუფლებას დავანახოთ, რომ საზოგადოებას გაზეთი სჭირდება. ხალხს აქვს გაზეთის იმედი და შესაბამისად გაზეთი თბილისში უნდა იყოს. დღევანდელი პროტესტი არის მხოლოდ დასაწყისი. ერთი კვირის შემდეგ კი აქცია, სავარაუდოდ, პრეზიდენტის სასახლესთანაც გაიმართება. ჩვენ ვაპირებთ წინასწარ გამოვაქვეყნოთ ყველა იმ ადგილის შესახებ ინფორმაცია, რომელზეც აუქციონი არის გამოცხადებული. ბიზნესმენებს ვთხოვთ, რომ არ მიიღონ მონაწილეობა ამ აუქციონში და თუ მიიღებენ მონაწილეობას დაიდება იმ ადამიანების სიები და ჩატარდება გამოძიება ხომ არ არიან ისინი ხელისუფლებასთან დაახლოებული ბიზნესმენები", - განაცხადა ჩაფიძემ.
მისი თქმით, ხელისუფლება ვერ მოახერხებს ბეჭდური მედიის ისევე დაშინებას, როგორც ეს მოახერხა ტელევიზიების შემთხვევაში.
