აქციაზე მედიის წარმომადგენლები აპროტესტებენ მერიის ათასი ჯიხურის პროგრამას, რომელთან დაკავშირებითაც ჩატარდა აუქციონი და დღეს არსებულ მედი ჯიხურებს ახალი ჯიხურები ჩაანაცვლებს.

აქციაზე მედიის წარმომადგენლების გარდა იმყოფებიან პოლიტიკოსები, ექსპერტები და სამოქალაქო საზოგადოების წარმომადგენლები.

აქციაზე დამსწრე საზოგადოებას პროტესტის გამოსახატად დაურიგეს სხვადასხვა გაზეთები.

აქცია პრესის ასოციაციისა და სხვადასხვა მედიასაშუალებების ორგანიზებით ტარდება.
როგორც ცნობილია, მერიამ პროექტ "1000 ჯიხურის" ფარგლებში აუქციონი გამოაცხადა. აუქციონი უმეტეს შემთხვევაში იმ ადგილებზეა გამოცხადებული, სადაც უკვე იდგა პრესის გავრცელების ჯიხურები. მათი აღების პროცესი უკვე დაწყებულია. საქართველოს პრესის ასოციაციამ საზოგადოების, ხელისუფლებისა და დიპლომატიური კორპუსის მიმართ მიმართვა გაავრცელა, რომელზე ხელმომწერებიც თბილისის მერიისგან ბეჭდვითი მედიის წინააღმდეგ გადადგმული ნაბიჯების შეჩერებას ითხოვენ.

"მოვითხოვთ, რომ ეს ე.წ. "ჯანსაღი კონკურენციის" საფარქვეშ მოქმედი აუქციონი არ შეეხოს იმ ჯიხურებს, სადაც უკვე წლების განმავლობაში ტრადიციულად იყიდება პრესა და, შესაბამისად, თბილისში დარჩეს თავისუფლების კუნძულები, სადაც მოქალაქეს შეეძლება ინფორმაციის მიღება და საკუთარი აზრის გამოტანა ქვეყანაში მიმდინარე პროცესებზე", - ნათქვამია მიმართვაში.