ბიზნესმენ ბიძინა ივანიშვილის პრესსამდივნო ზეწოლის მორიგ ფაქტზე საუბრობს. მათ მიერ გავრცელებული განცხადების თანახმად, დღეს ბიძინა ივანიშვილის ბიზნესცენტრის მომიჯნავე ტერიტორიაზე შპს "პროექტი ოცდაერთის" წარმომადგენლები საპატრულო სამსახურთან ერთად გამოცხადდნენ.
"მათ წარმოადგინეს ხელშეკრულება, რომლის მიხედვითაც, 1008 კვ. მეტრი ტერიტორია, რომლის მესაკუთრეც არის თბილისის თვითმმართველ ორგანო, 26 ოქტომბერს უზურფრუქტით გადაეცა ქურთის, ერედვისა და თოღვის მუნიციპალიტეტებს 5-წლიანი ვადით. გვინდა გაცნობოთ, რომ აღნიშნული მიწის ნაკვეთი არის შეჭრილი ივანიშვილის საკუთრებებს შორის. შპს "პროექტი ოცდაერთის" წარმომადგენლის - გაბრიელ ჭულუხაძის განცხადებით, მათ დავალებული აქვთ, აწარმოონ ტერიტორიის ტოპოგრაფიული გადაღება და მიწისქვეშა კომუნიკაციების დაფიქსირება. ივანიშვილის ადვოკატების მოთხოვნა - წარმოედგინათ დოკუმენტაცია, რომლის მიხედვითაც მესაკუთრე შპს "პროექტი ოცდაერთს" გარკვეულ ვალდებულებებს აკისრებს - მათ ვერ დააკმაყოფილეს. სრულიად გაურკვეველია, რატომ გახდა საჭირო საპატრულო სამსახურის გამოძახება, მაშინ, როდესაც მხარეებს შეეძლოთ სათანადო დოკუმენტების წარდგენის შემდგომ ურთიერთმოლაპარაკების გზით გადაეწყვიტათ პრობლემა", - აღნიშნულია მათ მიერ გავრცელებულ განცხადებაში.
განცხადების თანახმად, საპატრულო პოლიციის ეკიპაჟს თავად მთაწმიდა-კრწანისის პოლიციის უფროსი ხელმძღვანელობდა, რომელიც 2-3-წუთიანი ინტერვალით იღებდა ინსტრუქციებს სატელეფონო ზარით და საკითხის არსში გარკვევის ნაცვლად, აძლევდა მითითებებს შპს "პროექტი ოცდაერთის" წარმომადგენლებს, ჩაეტარებინათ სამუშაო მიმდებარე ტერიტორიაზე.
"ზემოთქმულიდან გამომდინარე, ეჭვს არ იწვევს ის ფაქტი, რომ 26 ოქტომბერს გაფორმებული ხელშეკრულება, რომლის მიხედვითაც, ივანიშვილის ბიზნესცენტრის მომიჯნავე ტერიტორია გადაეცა ქურთის, ერედვისა და თოღვის მუნიციპალიტეტებს 5-წლიანი ვადით, ემსახურება მხოლოდ ერთ მიზანს - ამგვარი პროვოკაციული და უკანონო მეთოდებით გაგრძელდეს პოლიტიკური ანგარიშსწორება ხელისუფლების მხრიდან ბიძინა ივანიშვილის მიმართ", - აღნიშნულია განცხადებაში.
