მისი განცხადებით, ხულორდავა 20 ნოემბერს, თბილისში დააკავეს, რის შემდეგაც ზუგდიდში გადაიყვანეს, სადაც 22 ნოემბერს მას ზუგდიდის რაიონული სასამართლოს მოსამართლე ირაკლი აბშილავამ წინასწარი პატიმრობა შეუფარდა.

"რევაზ ხულორდავას ბრალი ედება იმაში, რომ მან თითქოსდა დაჭრა კაცი იქ და იმ დროს, სადაც და რა დროსაც არ იმყოფებოდა. დაზარალებული დავით მგალობლიშვილი დაჭრილია 2011 წლის 15 სექტემბერს სენაკის მკვიდრ ვინმე ბერულავას ოჯახში, საიდანაც რევაზ ხულორდავა 20:30 საათისთვის წავიდა", - აგანაცხადა წულუკიანმა.

მისი თქმით, მგალობლიშვილის დაჭრა მომხდარია 22:00 საათის შემდეგ, რადგან სასწრაფო გამოძახებულია 22.30 საათზე.

წულუკიანმა განმარტა, რომ ბერულავას ოჯახიდან გამოსული რევაზ ხულორდავა სხვადასხვა დროს და სხვადასხვა ადგილას შეხვდა და ესაუბრა ჯერ ვინმე იზოლდა ჭითავას, შემდეგ გია ხოშტარიას, სუპერმარკეტის გამყიდველს, ვინმე რევაზ ზარანდიას მეუღლეს, ხოლო შემდეგ წავიდა შინ და გზად შეიძინა საკვები ვინმე დალი ჭითავას მაღაზიაში.

"შინ მისულ რევაზ ხულორდავას სახლში დახვდა მეუღლე და ძმისშვილი ანანო. მეორე დილით, რევაზ ხულორდავა წავიდა სამსახურში და სამართალდამცავ ორგანოებს მხოლოდ ახლა, ორი თვის შემდეგ გაახსენდათ, რომ სისხლის სამართლის დამნაშავე თურმე ხულორდავა ყოფილა", - განაცხადა წულუკიანმა.

წულუკიანმა აღნიშნა, ხულორდავას საწინააღმდეგო ჩვენებებს ბერულავას ოჯახი არ იძლევა და დასძინა, რომ საქმეში ფიგურირებს ბერულავას სიძე, თემურ ლუტიძე, რომელსაც აფხაზეთში უნდოდა გადასვლა და "შესაძლოა, უკვე აფხაზეთს აფარებდეს თავს".

"თავისუფალი დემოკრატების" თავმჯდომარის მოადგილის თქმით, მოცემული საქმე არის პოლიტიკური ანგარიშსწორება.

"რევაზ ხულორდავა გამოირჩეოდა განსაკუთრებული კრიტიკით ადგილობრივი ხელისუფლებისადმი კორუფციის და სახსრების არაპრიორიტეტული ხარჯვის საკითხში", - განაცხადა წულუკიანმა და აღნიშნა, რომ ""თავისუფალი დემოკრატებისაგან" ხულორდავას ჩამოშორება დიდი ხანია ადგილობრივი ხელისუფლების მიზანს წარმოადგენდა".

"მისი განზე გადგომა "თავისუფალი დემოკრატების" ფრაქციის დაშლას და კიდევ ერთი კრიტიკული აზრის ჩახშობას ნიშნავს", - განაცხადა წულუკიანმა.

"თავისუფალი დემოკრატების" თავმჯდომარის მოადგილე მოუწოდებს ბერულავას, მის სტუმარს - წულეისკირს, გამოვიდნენ, როგორც თვითმხილველები და თქვან, ვინ დაჭრა დავით მგალობლიშვილი.

წულუკიანი მიმართავს გამომძიებელს ნინო კვარაცხელიას და სამეგრელო ზემო სვანეთის სამხარეო პროკუროსრს როლანდ ახალაიასაც.

"მინდა მოვუწოდო გამომძიებელ ნინო კვარაცხელიას და მისთვის ინსტრუქციების მიმცემ როლანდ ახალაიას, დაინტერესდნენ თუ სად არის მიმალული თემურ ლუტიძე, რომელიც მასპინძლის სიძე გახლავთ და უნდა იყოს მგალობლიშვილის დამჭრელი. ბატონი ახალაია აგრეთვე უნდა დაინტერესდეს, რატომ სცემეს ბერულავა და წულეისკირი დაკითხვისას იმის მოთხოვნით, რომ "ჩაეშვათ" ხულორდავა"", - აღნიშნა წულუკიანმა.

წულუკიანმა გააკრიტიკა მოსამართლე ირაკლი აბშილავაც და მას კვალიფიკაციის ამაღლებისთვის უფასო კურსები შესთავაზა.

"ირაკლი აბშილავამ სხვა ბრალდებულის საქმიდან ამოიღო გადაწყვეტილება, უბრალოდ შეცვალა ხელით ბრალდებულის გვარი ხულორდავას გვარით და ასე დაადგინა, რომ აუცილებელი იყო ხულორდავას წინასწარ პატიმრობაში ყოფნა", - აღნიშნა წულუკიანმა.