დღეს, იუსტიციის სამინისტროს საჯარო რეესტრის ეროვნული სააგენტოს თავმჯდომარემ სოსო წიქარიშვილმა გურამ თავართქილაძის სასწავლო უნივერსიტეტის ბიზნეს ადმინისტრირების ფაკულტეტის სტუდენტებს, საქართველოში ბიზნესის რეგისტრაციის სფეროში გატარებული წარმატებული რეფორმები გააცნო. რეფორმის შედეგად, საქართველო მსოფლიო რეიტინგებში წამყვან პოზიციებს ინარჩუნებს.
სააგენტოს თავმჯდომარემ სტუდენტებს დეტალურად აუხსნა თუ რა პროცედურის გავლა მოუწევს ბიზნესის დაწყების მსურველ ნებისმიერ მოქალაქეს, რამდენად მარტივია დღეს საჯარო რეესტრში რეგისტრაციისთვის საჭირო ყველა პროცედურული რგოლის გავლა, საბუთების ჩაბარებიდან - ამონაწერის მომზადებამდე.
სტუდენტები გაეცნენ მეწარმეთა რეგისტრაციისთვის საჭირო ყველა ტრანზაქციას, სარეგისტრაციოდ წარსადგენი დოკუმენტების ნიმუშებს, განცხადებებსა თუ სხვა მონაცემებს; მოეწყო სააგენტოს ელექტრონული სერვისების პრეზენტაცია.
სტუდენტებმა ინტერესი გამოხატეს ორგანიზაციის ლიკვიდაციისა და რეორგანიზაციის მიმდინარეობის, ასევე, კომპანიის ქონებასა და პარტნიორთა წილებზე ყადაღისა და აკრძალვების, საგადასახადო გირავნობა/იპოთეკის საკითხებისადმი. მათ სააგენტოს თანამშრომლებმა ყველა საინტერესო კითხვაზე ამომწურავი ინფორმაცია მიაწოდეს.
საჯარო რეესტრი უმაღლესი სასწავლო დაწესებულებების სტუდენტთა ინფორმირებას მომავალშიც გეგმავს.
