პრემიერ-მინისტრის განმარტებით, 2012 წლის ბიუჯეტის დაგეგმარებისას გამოინახა იმის რესურსი, რომ მომავალი წლის 1-ლი სექტემბრიდან სოციალურ დახმარებაში მორიგი ცვლილებები განხორციელდეს.

"ცვლილება ნომერი ერთი - ყველა პენსიონერს მივცეთ სადაზღვეო პაკეტი, რომლის საბოლოო ფასი ტენდერის საფუძველზე გამოვლინდება, თუმცა დაახლოებითი ფასი 15-ლარიანი სადაზღვეო პაკეტია. რაც არის მნიშვნელოვანი რეფორმა ჩვენს ჯანდაცვის სისტემაში",- აღნიშნა პრემიერ-მინისტრმა.

გილაურმა აღნიშნა, რომ პენსიონერების დაზღვევა დღეს ძალიან გართულებულია, რადგანაც კერძო სექტორი ამ მიმართულებით მონდომებული არ არის. გილაურს პრეზიდენტი დაეთანხმა და აღნიშნა, რომ მისი დედა, რომელიც 60 წელს გადაცილებულია არავინ დააზღვია.

"რამდენიმე ჩემს მეგობარს, ნათესავს რაღაც რომ წამოსტკივდა და დაზღვევა არ ჰქონდათ საავადმყოფოს ხარჯები 17-18-20 ათას ლარზეც ავიდა. სწორედ ამის მერე გამიჩნდა იდეა და ვუთხარი დედაჩემს, რომ დაზღვეულიყო, თუმცა ვერ დაეზღვია", - განაცხადა პრეზიდენტმა.

გილაური ამბობს, რომ მსგავსი პრობლემა ბევრ ქვეყანაშია, რადგანაც ასეთი ასაკის ადამიანებს სადაზღვევო ბიზნესი მაღალი რისკის ადამიანებად მიიჩნევს.

სადაზღვეო პაკეტში შევა ულიმიტო გადაუდებელი ოპერაციები, საიდანაც თანხის 80 %-ს სახელმწიფო დაფარავს. გარდა ამისა, პაკეტში შევა წამლის თანადაფინანსება, რომელიც იქნება 50 %-იანი და იქნება 200-ლარიანი ლიმიტი. ანალიზები იქნება უფასო.

პრემიერ-მინისტრის თქმით, ანალოგიური სადაზღვეო პაკეტი უნდა ამოქმედდეს ასევე 0 დან 5 წლამდე ასაკის ბავშვებზეც.

"გვაქვს საფინანსო რესურსი, რომ 2012 წლის 1-ლი სექტემბრიდან 67 წელს ზემოთ მყოფი პენიონერებისათვის პენსიების გავზარდოთ, რაც იმას ნიშნავს რომ საპენსიო პაკეტი გაიზრდება 140 ლარამდე", - აცხადებს გილაური და როგორც ირკვება აღნიშნულ პაკეტში შევა დაზღვევის თანხაც.

მიხეილ სააკაშვილმა მთავრობის წევრებთან შეხვედრისას 2008 წელს გაცემული დაპირებაც გაიხსენა, რომელიც პენსიის 100 დოლარამდე გაზრდას ითვალისწინებდა. პრეზიდენტმა აღნიშნა ამის შემდეგ იყო ომი და მთავრობა დაპირებას ეტაპობრივად ასრულებს. სააკაშვილმა აღნიშნა, რომ მას დაპირება არ დავიწყებია და მისი საპრეზიდენტო ციკლის დასრულებამდე პენსიების ზრდა გაგრძელდება.