"თუ მტრობის გეშინიათ, შეხედეთ სააკაშვილის ქმედებას და გააანალიზეთ კარგად. განა მასში არ ჩანს ის ყველაფერი, რაც მე გინდათ მომაწებოთ?! განა მტრული არ არის ის, რასაც ახორციელებს ის ქვეყნის შიგნით?! ამდენმა ძალადობამ საგარეო პოლიტიკაში ნახეთ სადამდე მიგვიყვანა!" - ეს განცხადებები ბიზნესმენმა ბიძინა ივანიშვილმა დღეს მოწყობილ პრესკონფერენციაზე გააკეთა.
"სააკაშვილს კი ჰგონია, რომ ქართველი ხალხი ბრიყვია, მაგრამ არ არის ასე, ყველა ყველაფერს კარგად ხვდება და არავინ ამას აღარ ჭამს. თუ ასე ძალიან განიცდიან სააკაშვილი და მისი სატელიტი ტელევიზიები ასეთ საკითხს, ორი კარგი მაგალითი გაქვთ - ბენდუქიძე და ვაშაძე. ბენდუქიძეს შეიძლება იმდენი არ აქვს, რამდენიც მე, მაგრამ საკმაოდ მდიდარი მულტიმილინერია. იგი სააკაშვილის მრჩევლად არის წამოსული რუსეთიდან და მინისტრად დაისვა. რატომ იქ არ გაჩნდა ეს კითხვები. და მეორე: საგარეო საქმეთა მინისტრი, ბატონი ვაშაძე, რომელიც მუშაობდა საგარეო საქმეთა სამინისტროში. რატომ იქ არ აღძრულა ეს კითხვები და რატომ ვრცელდება მარტო ჩემზე, როცა არავითარი საფუძველი არ არსებობს ამისა?! - იმიტომ, რომ მათ ჩემი საწინააღმდეგო არაფერი გააჩნიათ. იმ ელემენტარული მიზეზის გამო, რომ არ არსებობს ჩემგან კანონდარღვევითი ქმედებები და მინდა ამის ანალიზი გააკეთოს მოსახლეობამ",- აცხადებს ივანიშვილი.
