თუ ამჯერად რუსეთი მიღებულ გადაწყვეტილებას არ დათანხმდება ნათელი იქნება რომ რუსეთს საერთოდ არ სურს ვმო-ს პრინციპების გათვალისწინება და სურს, რაღაც ექსკლუზიური უფლებების მოპოვება, რაც მიუღებელია, - ამის შესახებ განცხადება ქვეყნის ვიცე-პრემიერმა გიორგი ბარამიძემ გააკეთა.
ბარამიძის განმარტებით, საქართველოსთვის მნიშვნელოვანია, რომ საქართველო-რუსეთის საზღვარზე ვაჭრობის პროცესი იქნეს გაკონტროლებული საერთაშორისო ორგანიზაციების მიერ.
"ჩვენთვის მნიშვნელოვანია, რომ საქართველო რუსეთის საზღვარზე ვაჭრობის პროცესს გააკონტროლებს საერთაშორისო ორგანიზაციების მიერ ორგანიზებული მისია. როგორც ფიზიკურად ასევე ელექტრონული მეთოდებით. და ეს იქნება დასპონსორებული შვეიცარიისა და ევროკავშირის მიერ. ჩვენთვის მნიშვნელოვანია, რომ მონიტორინგი რეალურად ხორციელდებოდეს", - განაცხადა გიორგი ბარამიძემ.
ბარამიძე აცხადებს, რომ რუსეთის ვმო-ში გაწევრიანების გზაზე საქართველომ მორიგი კომპრომისული ნაბიჯი გადადგა.
"ჩვენ გადავდგით კომპრომისული ნაბიჯი, რადგან ჩვენ შეგვეძლო ხისტი პოზიცია დაგვეკავებინა და მოგვეთხოვა აუცილებელად ქართველი მებაჟეების დაყენება, მაგრამ გვესმის, რომ დღევანდელი ვითარება ამის საშუალებას არ იძლევა და შევეცადეთ ვყოფილიყავით კონსტრუქციულები, რადგან ეს ჩვენს ინტერესებშიც შედის, რომ ასეთი დიდი მეზობელი სახელმწიფო, თუნდაც მინიმალურ დონეზე იმ წესებსა და პრინციპებს აღიარებდეს, რომელიც ვმო-ს აქვს", - განაცხადა გიორგი ბარამიძემ.
ბარამიძემ განმარტა, რომ შვეიცარიის წინადადება ითავლისწინებს საქართველოს პრინციპულ მიდგომებს, რომ საზღვცარი იყოს გამჭვირვალე და ვაჭრობა ხდებოდეს გამჭვირვალედ და არ იყოს რაიმე განსხვავებული რეჟიმები ოკუპირებულ ტერიტორიებთან მიმართებაში.
"ახლა რუსეთის მხარეს არის ბურთი და მათ უნდა მიიღონ გადაწყვეტილება", - განაცხადა ბარამიძემ.
