ნატო-ს გენერალური მდივნის სპეციალური წარმომადგენლის ცენტრალურ აზიასა და კავკასიაში ჯეიმს აპატურაის განცხადებით, ჩიკაგოს სამიტზე კიდევ ერთხელ დადასტურდება, რომ საქართველო ნატო-ს წევრი ქვეყანა გახდება.
"საქართველო პატარა ქვეყანაა, მაგრამ იმ ოპერაციებში, რომელშიც მონაწილეობს დიდი წვლილი შეაქვს. ჩვენ განვიხილავთ თუ როგორ შეიძლება გაღრმავდეს და გაძლიერდეს თანამშრომლობა და კავშირები საქართველოსა და ნატოს შორის. ჩიკაგოს სამიტზე დარწმუნებული ვარ მკაფიოდ გაჟღერდება, რომ საქართველო გახდება ნატოს წევრი ქვეყანა", - განაცხადა აპატურაიმ.
მისი თქმით, საქართველომ უნდა გააგრძელოს რეფორმები, რათა მოუახლოვდეს ნატო-ში ინტეგრაციას. აპატურაის თქმით, ნატო ადასტურებს თავის მხარდაჭერას საქართველოს ტერიტორიული მთლიანობის მიმართ.
