ეროვნული ბანკის პრეზიდენტის გიორგი ქადაგიძის განცხადებით არანაირი საფრთხე "ქართუ ბანკის" ნორმალურ ფუნქციონირებას არ ემუქრება. ეს განცხადება ქადაგიძემ ჟურნალისტებთან საუბარში დღეს პარლამენტში გააკეთა.
"ჩვენ მზად ვართ საჭიროებიდან გამომდინარე ავამოქმედოთ კომპლექსური დახმარების პროგრამა "ქართუ ბანკთან" მიმართებაში, ასევე მზად ვართ გამოვყოთ ფინანსური რესურსი 2 მილიონი აშშ დოლარის და 1 მილიონი ევროს ოდენობით ანუ დაყადაღებული თანხის ოდენობით იმ მიზნით, რომ ერთხელ და სამუდამოდ დამთავრდეს პოლიტიკური სპეკულაცია ამ თანხასთან დაკავშირებით", _ განაცხადა გიორგი ქადაგიძემ.
მისივე თქმით, საბანკო სექტორში ძალიან დიდი წარმატებების და ერთ-ერთი მთავარი ქვაკუთხედი არის საბანკო სექტორის პოლიტიკური წნეხისაგან თავისუფლება.
"ჩვენ ვერ დავუშვებთ, რომ უნდაც ერთი ბანკი მაინც დაბრუნდეს 90-იან წლებში. სიტუაციის ბოლომდე დასტაბილურებამდე მზად ვართ გამოვყოთ სესხი ან სხვა ტიპის ინსტრუმენტი იმისათვის, რომ პოლიტიკური სპეკულაცია ამ თემაზე ერთხელ და სამუდამოდ დამთავრდეს", _ განაცხადა ქადაგიძემ.
