ქუთაისში გაიმართება გამოფენა "იტალია საქართველოში: ათასწლოვანი დიალოგი", რომელიც მარტის თვეში დიდი წარმატებით ჩატარდა თბილისში და ეძღვნებოდა იტალიის გაერთიანების 150 წლისთავს (http://www.ambtbilisi.esteri.it/Ambasciata_Tbilisi/Archivio_News/inaugurata+la+mostra.htm).
როგორც „ჯი-ეიჩ-ენს" საქართველოში იტალიის საელჩოდან აცნობეს, ქუთაისში დაგეგმილი გამოფენა საქართველოში იტალიური ენის მეთერთმეტე კვირეულის პროგრამის ნაწილია (http://www.ambtbilisi.esteri.it/Ambasciata_Tbilisi/Archivio_News/XI+Settimana+Lingua+Italiana.htm) და მისი ორგანიზატორები არიან იტალიის საელჩო საქართველოში, საქართველოს თეატრის, კინოს, მუსიკისა და ქორეოგრაფიის სახელმწიფო მუზეუმი, ქ. ქუთაისის მერია და ქ. ქუთაისის დავით კაკაბაძის სახელობის სახვითი ხელოვნების გალერეა.
გამოფენაზე წარმოდგენილი იქნება საქართველოს თეატრის, კინოს, მუსიკისა და ქორეოგრაფიის სახელმწიფო მუზეუმში დაცული ექსპონატები, რომლებიც ადასტურებს საქართველოში იტალიელების არსებობას.
"ჩვენ ძალიან გვინდოდა ამ მნიშვნელოვანი ღონისძიების ჩატარება ქუთაისში, ძირძველი ისტორიისა და იტალიასთან მჭიდრო კავშირის მქონე ქალაქში, - განაცხადა იტალიის ელჩმა, ფედერიკა ფავიმ, - "ვისურვებდი, რომ გამოფენას, რომელიც კულტურული თვალსაზრისით, ურთიერთგამდიდრების საწინადრია, თავისი წვლილი შეეტანოს ამ კავშირის გაძლიერებაში".
გამოფენა გაიხსნება 21 ოქტომბერს 17:00 საათზე და გაგრძელდება 2011 წლის 31 ოქტომბრამდე.
პრესკონფერენცია ჩატარდება 21 ოქტომბერს, 12:30 საათზე ქ. ქუთაისის მერიის "თეთრ დარბაზში".
