„რუსთავქალაქობა 2011" 15 და 16 ოქტომბერს აღინიშნება, ქალაქის ხელისუფლება რუსთაველებსა და ქალაქის სტუმრებს მრავალფეროვან ღონისძიებებს შესთავაზებს.
სადღესასწაულო პროგრამა 15 ოქტომბერს დილიდან, სპორტული ღონისძიებებით დაიწყება და 16 ოქტომბერს, მამბოს ცნობილი გერმანელი შემსრულებლის, ლუ ბეგას კონცერტით დასრულდება. „რუსთავქალაქობის" პირველივე დღეს, საზეიმო ვითარებაში გაიხსნება განახლებული ქალაქის ცენტრალური მოედანი, სადაც ამ დროისთვის სარეკონსტრუქციო სამუშაოები ჯერ კიდევ მიმდინარეობს.
ქალაქის დღესთან დაკავშირებით ადგილობრივი ხელისუფლება საპატიო მოქალაქეებსაც დააჯილდოებს. სადღესასწაულო პროგრამის ფარგლებში, გაიმართება როგორც ქორეოგრაფიული, ისე საესტრადო კონცერტები. ქართული მუსიკის მოყვარულებს ანსამბლ „რუსთავის" სოლო კონცერტი და ქართული ჯგუფების : „ფრანის", „რეგიონის", ნიაზ დიასამიძისა და „ჩვენებურების" მუსიკა ელით, თეატრის მოყვარულებს კი პრემიერა - სპექტაკლი „გველისმჭამელი".
სპეციალურად ბავშვებისთვის, მოეწყობა საესტრადო კონცერტიც, სადაც მათ რუსთაველი თანატოლები, ანა -ბანას გამარჯვებულები უმღერებენ. ისინი შეკრებილი პატარებისთვის სოლო სიმღერებთან ერთად, ცნობილ მომღერლებთან ერთად დუეტებს შეასრულებენ.
