რუსეთის გენერალურმა პროკურატურამ ელენე ხოშტარიას ოპოზიციური პარტია, „დროა“ რუსეთის ტერიტორიაზე არასასურველ ორგანიზაციად გამოაცხადა. ამის შესახებ რუსული მედია რუსეთის პროკურატურაზე დაყრდნობით იუწყება.
რუსეთის გენერალური პროკურატურის მტკიცებით, პარტიის წევრებს „გამოკვეთილად რუსოფობიური შეხედულებები“ აქვთ და რუსეთის საქმიანობის დისკრედიტაციას ცდილობენ საქართველოს მიმართულებით.
უწყების განცხადებით, „დროა“ ეწინააღმდეგება რუსეთთან პოლიტიკური, ეკონომიკური და კულტურულ-ჰუმანიტარული ურთიერთობების ნორმალიზებას, მოითხოვს სავიზო რეჟიმის აღდგენასა და ქვეყნებს შორის პირდაპირი ავიამიმოსვლის შეწყვეტას.
„ისინი მიიჩნევენ, რომ რუსეთმა აფხაზეთისა და სამხრეთ ოსეთის ოკუპაცია მოახდინა, დაარღვია საერთაშორისო სამართლის ნორმები და ამიერკავკასიის სახელმწიფოს სუვერენიტეტი“, - ნათქვამია რუსეთის გენერალური პროკურატურის განცხადებაში.
შენიშვნა: „რუსოფობიური“ და სხვა შეფასებები რუსეთის გენერალური პროკურატურის განცხადებიდანაა მოყვანილი და არა დადასტურებული ფაქტები.
რუსეთის გენერალური პროკურატურის განცხადებით, „დროას“ საქმიანობა ასევე მიმართულია „ადგილობრივი მმართველი ელიტის რუსეთთან კავშირების მხილებისა და საქართველოს ერთპარტიული სისტემის დემონტაჟისკენ, ასევე ქვეყნის ევროკავშირში დაჩქარებული ინტეგრაციის იდეის პოპულარიზაციისკენ“.
რუსეთის უწყების მტკიცებით, პარტიის ლიდერი საქართველოს მმართველ პარტიას პრორუსული კურსის მხარდაჭერასა და ქვეყნის ევროპული ინტეგრაციის პროცესისგან იზოლირების მცდელობაში ადანაშაულებს.
გარდა ამისა, რუსეთის გენერალური პროკურატურის განცხადებით, ორგანიზაცია აქტიურად უჭერს მხარს უკრაინის ხელისუფლებას, მოუწოდებს საქართველოსა და უკრაინას შორის უფრო მჭიდრო თანამშრომლობის დამყარებისა და ქვეყნის „კარპატების რვიანში“ გაწევრიანებისკენ.
„კარპატების რვიანი“ უკრაინის მიერ შეთავაზებული საერთაშორისო ფორმატია, რომელშიც უკრაინამ ავსტრიის, უნგრეთის, პოლონეთის, სერბეთის, სლოვაკეთის, რუმინეთისა და ჩეხეთის წარმომადგენლები მიიწვია.
