აშშ-ის პრეზიდენტი დონალდ ტრამპი ირანთან დაკავშირებით სამ შესაძლო სცენარს განიხილავს: სამშვიდობო შეთანხმების მიღწევას, სამხედრო მოქმედებების განახლებას ან თეირანზე ეკონომიკური ზეწოლის გაძლიერებას. ამის შესახებ გამოცემა Axios წერს.

ამასთან, აშშ-ის პრეზიდენტის განცხადებით, გადაწყვეტილების მიღებას არ ჩქარობს.

„ასეა თუ ისე, რაღაცას გავაკეთებთ, მაგრამ არსად გვეჩქარება. ჩვენ მათ ფინანსური ზიანი მივაყენეთ. მათ ფული არ აქვთ, ბენზინი არ აქვთ და მათი მოსახლეობა ამ ყველაფრით ძალიან დაიღალა.

მათთან მოლაპარაკებებს ვაწარმოებთ. ყველაფერი კარგად მიდის. მათთან პრობლემა ის არის, რომ ცდილობენ, დაგვაჩქარონ, თავად კი ერთ ადგილას დგანან. მათ მხრიდან გადაუდებლობის განცდა იმაზე ნაკლებია, ვიდრე მოსალოდნელი იქნებოდა, თუმცა შეთანხმების დადება ისე უნდათ, როგორც არასდროს“, - განაცხადა ტრამპმა.

Axios-ის ცნობით, ტრამპის ადმინისტრაციაში ირანთან დაკავშირებით სამი განსხვავებული პოზიცია არსებობს და თითოეულ მათგანს პრეზიდენტის გარემოცვის სხვადასხვა ჯგუფი უჭერს მხარს.

სამშვიდობო შეთანხმება: ვიცე-პრეზიდენტი ჯეი დი ვენსი და აშშ-ის პრეზიდენტის სპეციალური წარმომადგენელი სტივ უიტკოფი ტრამპს შეთანხმების მიღწევისკენ მოუწოდებენ. მათი აზრით, სამხედრო მოქმედებების განახლებამ შესაძლოა ვითარება უკეთესობისკენ ვერ შეცვალოს. ამ პოზიციას სპარსეთის ყურის ქვეყნების უმრავლესობაც იზიარებს და, გამოცემის წყაროების ცნობით, ამის შესახებ ტრამპსაც აცნობეს.

სამხედრო მოქმედებების განახლება: ისრაელის პრემიერ-მინისტრი ბენიამინ ნეთანიაჰუ და აშშ-ის თავდაცვის მდივანი პიტ ჰეგსეთი ირანის წინააღმდეგ სამხედრო ოპერაციის განახლების მომხრეები არიან. მათი აზრით, თეირანს შეთანხმების მიღწევისა და შესრულების საკითხში არ უნდა ენდო და აუცილებელია სამხედრო გზით დაწყებული მიზნების ბოლომდე მიყვანა.

ეკონომიკური ზეწოლის გაგრძელება: აშშ-ის სახაზინო მდივანი სკოტ ბესენტი, ცენტრალური სადაზვერვო სააგენტოს დირექტორი ჯონ რატკლიფი და სახელმწიფო მდივანი მარკო რუბიო მხარს უჭერენ არსებული მდგომარეობის შენარჩუნებას - არც ომის განახლებას და არც შეთანხმების დადებას, არამედ ირანზე ეკონომიკური ზეწოლის გაგრძელებას. მათი შეფასებით, ხანგრძლივმა ეკონომიკურმა ზეწოლამ შესაძლოა თეირანს დამატებით დათმობებზე წასვლა აიძულოს ან ქვეყანაში ისეთი არასტაბილურობა გამოიწვიოს, რომელიც მოსახლეობის პროტესტს გააძლიერებს.

გამოცემის ინფორმაციით, კატარის შუამავლებმა შეიმუშავეს შეთანხმების პროექტი, რომელიც აშშ-სა და ირანს შორის პირდაპირი მოლაპარაკებების განახლების მიზნით ნდობის აღდგენის სამდღიან ეტაპებს ითვალისწინებს. შუამავლები ამჟამად ორივე მხარის პასუხს ელოდებიან.

ამასთან, ირანის პრეზიდენტმა მასუდ ფეზეშქიანმა განაცხადა, რომ ქვეყნის უზენაესმა ლიდერმა, მოჯთაბა ხამენეიმ, მთავრობას დიპლომატიური გზით შეთანხმების მიღწევის მიზნით გარკვეული უფლებამოსილებები მიანიჭა. ირანის საგარეო საქმეთა მინისტრის, აბას არაღჩის განცხადებით კი, შუამავლების მეშვეობით დიპლომატიური კომუნიკაცია გააქტიურებულია.