ისრაელის ცენტრალური საარჩევნო კომისიის მიერ გამოქვეყნებული წინასწარი შედეგებით, ხმების 41.9%-ის დათვლის შემდეგ, პრემიერ-მინისტრ ბენიამინ ნეთანიაჰუს მხარდამჭერ ბლოკს ქნესეთში 57 მანდატი აქვს, მის მოწინააღმდეგე ბლოკს კი - 47. დარჩენილ 16 მანდატს არაბული პარტიები - „ერთიანი სია“ და რაამი ინაწილებენ.
ხმების დათვლა კვლავ გრძელდება. მოგვიანებით დაითვლება ორმაგ კონვერტებში მოთავსებული ბიულეტენებიც, მათ შორის სამხედრო მოსამსახურეების ხმები, რის შემდეგაც შედეგები შეიძლება შეიცვალოს.
ისრაელის ქნესეთში სულ 120 ადგილია. მთავრობის ჩამოსაყალიბებლად მინიმუმ 61 მანდატის მოპოვებაა საჭირო. ამ ეტაპზე არც ერთ მთავარ პოლიტიკურ ბლოკს დამოუკიდებლად არ აქვს საპარლამენტო უმრავლესობა, რის გამოც მთავრობის ფორმირების პროცესში არაბულ პარტიებს შესაძლოა მნიშვნელოვანი როლი დაეკისროთ.
