რუსეთის საგარეო საქმეთა მინისტრის, სერგეი ლავროვის განცხადებით, უკრაინის პრეზიდენტმა ვოლოდიმირ ზელენსკიმ ქვეყანაში არჩევნების ჩატარებისთვის წინასწარ მიუღებელი პირობები დააწესა, რის გამოც მოსკოვი ცეცხლის შეწყვეტას არ აპირებს.
„ბატონმა ზელენსკიმ უკვე ნათლად აჩვენა, რომ არჩევნები არ აინტერესებს, რადგან მათი ჩატარება ისეთი პირობებით მოითხოვა, რომლებიც თავიდანვე მიუღებელია. ცეცხლის შეწყვეტა იმისთვის, რომ ის კვლავ მოიყვანონ გონს და იარაღით მოამარაგონ, არ იქნება“, - განაცხადა ლავროვმა 15 ოქტომბერს, ბაქოში გამართულ პრესკონფერენციაზე.
მისი თქმით, ეს განცხადება პასუხი იყო კითხვაზე, წავა თუ არა რუსეთი შესაძლო სამშვიდობო მოლაპარაკებების ფარგლებში დათმობებზე, თუ უკრაინაში საპრეზიდენტო არჩევნები ჩატარდება.
სერგეი ლავროვის განცხადებით, ვოლოდიმირ ზელენსკიმ დიზელის მიწოდების შესახებ შეთანხმებასთან დაკავშირებული პოზიციით აჩვენა, რომ კონსტრუქციული თანამშრომლობისთვის მზად არ არის.
„ზელენსკი მიიჩნევს, რომ მთელი მსოფლიო მის წინაშე ვალშია, თავად კი სანაცვლოდ არაფრის გაკეთება არ ევალება“, - განაცხადა ლავროვმა.
რუსეთის საგარეო საქმეთა მინისტრმა ზელენსკის პოზიციას აშშ-ის პრეზიდენტ დონალდ ტრამპის მიმართ პირდაპირი გამოწვევა უწოდა.
„რაც შეეხება დიზელის შეთანხმებას, ეს შეთანხმება შემოთავაზებული იყო და ჩვენ მას მხარი დავუჭირეთ. თუმცა, ბატონმა ზელენსკიმ უკვე არაერთხელ განაცხადა: ნუ მაწუხებთ ამ დიზელის შეთანხმებით, სჯობს Patriot-ის სისტემისთვის რაკეტები მომეცით - მე კი რუსეთის ენერგეტიკულ სექტორზე, მათ შორის ნავთობგადამამუშავებელ ქარხნებზე, დარტყმებს გავაგრძელებ“, - თქვა ლავროვმა.
