უკრაინის პრეზიდენტმა ვოლოდიმირ ზელენსკიმ განაცხადა, რომ სამწუხაროა აშშ-ის სახით ძლიერი პარტნიორის დაკარგვა. ამის შესახებ მან ბრიტანელ ჟურნალისტ პირს მორგანთან ინტერვიუში ისაუბრა.
„მტკივნეულია, როდესაც პრეზიდენტი ტრამპი ერთ მხარეს ირჩევს და ეს ჩვენი მხარე არ არის“, - განაცხადა ზელენსკიმ.
მისი თქმით, უკრაინა მისაღებად მიიჩნევს, თუ ტრამპი უკრაინასა და რუსეთს შორის შუამავლის პოზიციას დაიკავებს, თუმცა ამ პოზიციას თანმიმდევრულად უნდა მიჰყვეს.
„თუ შუაში ხარ, შუაში უნდა დარჩე“, - აღნიშნა უკრაინის პრეზიდენტმა.
ჟურნალისტის კითხვაზე, გრძნობს თუ არა თავს ტრამპის გადაწყვეტილებების გამო მოტყუებულად, ზელენსკიმ უპასუხა, რომ გარკვეულწილად - დიახ, თუმცა ვითარება მხოლოდ მის ემოციებსა და გრძნობებზე რთულია.
ზელენსკიმ გააკრიტიკა აშშ-სა და რუსეთს შორის რუსული დიზელის საწვავის ამერიკულ და მსოფლიო ბაზრებზე მიწოდების შესახებ მიღწეული შეთანხმებაც. მისი შეფასებით, ეს რუსეთის პრეზიდენტ ვლადიმირ პუტინისთვის მარტივი გამარჯვება იყო.
„სამწუხაროა, რომ ძლიერ პარტნიორს ვკარგავთ. ასე რომ, ეს ჩემი მოსაზრებაა… მაგრამ ჩვენს გამო არ ხდება ეს. ჩვენ არ შეგვიძლია სუსტები ვიყოთ, წინააღმდეგ შემთხვევაში ვერ გადავრჩებით. ჩვენს ქვეყანას არ ვყიდით. ეს ჩვენთვის ბიზნესს არ ეხება, ეს ჩვენი ცხოვრებაა და ეს ჩვენი ქვეყანაა - ჩვენი სახლი, ჩვენი შვილები და ეს ძალიან მნიშვნელოვანია ჩვენთვის“, - განაცხადა ზელენსკიმ.
უკრაინის პრეზიდენტმა ასევე გააკრიტიკა ტრამპის მრჩევლები და აღნიშნა, რომ ისინი, მისი აზრით, აშშ-ის პრეზიდენტს არასწორი მიმართულებით უბიძგებენ.
