იტალიის პრემიერ-მინისტრმა ჯორჯია მელონიმ განაცხადა, რომ არ სურს ევროპულ ქვეყნებში რუსული ტანკების დაბრუნება. ამით მან პარლამენტარებს აუხსნა, რატომ უნდა გააგრძელოს იტალიამ უკრაინის მხარდაჭერა და არ დაუშვას მისი კაპიტულაცია.
მელონის თქმით, უკრაინის მხარდაჭერა არა მშვიდობის ალტერნატივა, არამედ ის ნაბიჯია, რომელიც მშვიდობას აახლოებს.
„კაპიტულაცია მშვიდობა არ არის - ეს დაპყრობაა. უკრაინას ხვალვე რომ შეეწყვიტა თავდაცვა, როგორც ამას ბევრი იმედოვნებს ან გვთავაზობს, მშვიდობას ვერ მივიღებდით. ჩვენ ევროპული ქვეყნის ოკუპაციასა და საბჭოთა სტილის იმპერიალიზმის დაბრუნებაზე მოგვიწევდა საუბარი - იმაზე, რაც ევროპამ ნახევარი საუკუნის განმავლობაში გამოსცადა“, - განაცხადა იტალიის მთავრობის მეთაურმა.
მან დასძინა, რომ არ ენატრება ის წლები, როდესაც ევროპული ქვეყნები საბჭოთა ბატონობის ქვეშ ცხოვრობდნენ.
„არ მენატრება რუსული ტანკები, რომლებიც პრაღასა და ბუდაპეშტში აჯანყებებს ახშობდნენ, და არც ბერლინის კედელი მენატრება. ვერავინ დამარწმუნებს, რომ იმ ადამიანების კაპიტულაციას, რომლებიც საკუთარ თავისუფლებას იცავენ, შეიძლება მშვიდობა ეწოდოს. მშვიდობა, რომლის მიღწევასაც ვცდილობთ და რომლის დამყარებაზეც ვმუშაობთ, თუნდაც ამისთვის მხარდაჭერის ნაწილი დავკარგოთ, სამართლიანი მშვიდობაა“, - განაცხადა მელონიმ.
