უკრაინამ აშშ-ს ომის დასრულების შესახებ მოლაპარაკებების ფარგლებში მომდევნო შეხვედრების გამართვასთან დაკავშირებით წინადადებები გადასცა და უახლოეს დღეებში შეხვედრებისთვის მზად არის. ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვისას განაცხადა.
მისი თქმით, უკრაინა ამერიკულ მხარესთან მუდმივ კომუნიკაციაშია.
„ჩვენი გუნდები მოლაპარაკებებს აწარმოებენ. საჭიროა მშვიდობისთვის მუშაობა და მოქმედების სწორი გზების ძიება. უკრაინა მზად არის შეხვედრებისთვის. ჩვენ მხარი დავუჭირეთ ამერიკის პრეზიდენტს ენერგეტიკული ცეცხლის შეწყვეტის საკითხში. აუცილებელია, რომ რუსეთიც ამ შეთანხმების ნაწილი გახდეს“, - განაცხადა ზელენსკიმ.
პრეზიდენტის თქმით, უკრაინულმა გუნდმა ამერიკულ მხარეს მომდევნო შეხვედრებისა და მოლაპარაკებების შესაძლო გამართვასთან დაკავშირებით შესაბამისი წინადადებები გაუგზავნა.
„უახლოეს დღეებში შეხვედრებისთვის მზად ვართ. ეს წინადადება ჩემი გუნდის მეშვეობით სტივ უიტკოფსა და ჯარედ კუშნერს გადავეცი. უკრაინული მხარე ყოველთვის კონსტრუქციულად არის განწყობილი, ჩვენი პოზიციები კი ყოველთვის მკაფიოა და უკრაინელი ხალხის დამოუკიდებლობის დაცვას ემსახურება“, - დასძინა ზელენსკიმ.
გასულ უქმეებზე აშშ-ის პრეზიდენტის წარმომადგენლები, სტივ უიტკოფი და ჯარედ კუშნერი, მაიამიში უკრაინის მომლაპარაკებელთა გუნდსა და ევროპის ქვეყნების წარმომადგენლებს შეხვდნენ. მედიის ცნობით, მოლაპარაკებები დაგეგმილზე ადრე დასრულდა.
გავრცელებული ინფორმაციით, მაიამიში გამართულ შეხვედრებზე აშშ-ის წარმომადგენლებმა უკრაინელ მომლაპარაკებლებს განუცხადეს, რომ რუსეთის დიზელის ექსპორტის ნებართვის შესახებ შეთანხმება რუსეთის მოლაპარაკებების მაგიდასთან დაბრუნების მცდელობის ნაწილია.
მედია ასევე წერდა, რომ მაიამიში მოლაპარაკებების დროს უიტკოფმა შეხვედრა დროებით დატოვა, რათა დონალდ ტრამპისა და ვლადიმირ პუტინის სატელეფონო საუბარში მიეღო მონაწილეობა.
