2026 წლის ნობელის მშვიდობის პრემია სამხრეთაფრიკელ იურისტ ნავანეთემ „ნავი“ პილაის მიენიჭა. ნორვეგიის ნობელის კომიტეტმა ჯილდო მას მშვიდობისა და საერთაშორისო სამართლის განმტკიცებაში შეტანილი წვლილისთვის გადასცა.
კომიტეტის განცხადებით, პილაიმ მნიშვნელოვანი როლი შეასრულა ომის დანაშაულების, კაცობრიობის წინააღმდეგ ჩადენილი დანაშაულებისა და გენოციდის საქმეებზე სამართლებრივი დევნის უზრუნველყოფაში. კომიტეტმა ხაზი გაუსვა საერთაშორისო სამართლის მნიშვნელობას იმ ფონზე, როდესაც მსოფლიოში ომებისა და კონფლიქტების რაოდენობა იზრდება, ხოლო საერთაშორისო სამართლებრივი ინსტიტუტები პოლიტიკური ზეწოლის ქვეშ არიან.
85 წლის ნავი პილაი საერთაშორისო სამართლის სფეროში ხანგრძლივი კარიერით გამოირჩევა. ის სამხრეთ აფრიკის უმაღლესი სასამართლოს მოსამართლე იყო, მოგვიანებით კი მუშაობდა რუანდის საერთაშორისო სისხლის სამართლის ტრიბუნალსა და სისხლის სამართლის საერთაშორისო სასამართლოში. 2008-2014 წლებში პილაის გაეროს ადამიანის უფლებათა უმაღლესი კომისრის თანამდებობა ეკავა.
აპარტეიდის პერიოდში პილაი ნელსონ მანდელასა და სხვა ანტიაპარტეიდული აქტივისტების დაცვაშიც მონაწილეობდა. 1967 წელს ის ნატალის პროვინციაში პირველი ქალი გახდა, რომელმაც საკუთარი იურიდიული პრაქტიკა დააარსა, ხოლო 1995 წელს სამხრეთ აფრიკის უმაღლესი სასამართლოს პირველი ფერადკანიანი ქალი მოსამართლე გახდა.
ნობელის მშვიდობის პრემიის გადაცემის ცერემონია ოსლოში, 10 დეკემბერს გაიმართება. ჯილდოს ფულადი ღირებულება 12 მილიონ შვედურ კრონას შეადგენს
