უკრაინის თავდაცვის ძალებმა ომსკში, რუსეთის უმსხვილეს ნავთობგადამამუშავებელ ქარხანას დაარტყეს. ამის შესახებ უკრაინული და რუსული Telegram-არხები იუწყებიან.
„ომსკში რუსეთის საჰაერო თავდაცვის სისტემის გარღვევა მოხერხდა. უკრაინის თავდაცვის ძალების დამრტყმელმა უპილოტო საფრენმა აპარატებმა ომსკის ნავთობგადამამუშავებელ ქარხანაზე დარტყმა განახორციელეს. ის რუსეთის უმსხვილესი ნავთობგადამამუშავებელი ქარხანაა“, - წერს Telegram-არხი Exilenova+.
თავდასხმას უკრაინული თავდაცვის კომპანია Fire Point-იც ადასტურებს.
Fire Point-ის ინფორმაციით, უკრაინის თავდაცვის ძალებმა რუსეთის უმსხვილეს ნავთობგადამამუშავებელ ქარხანაზე, რომელიც უკრაინის საზღვრიდან 2 500 კილომეტრზე მეტ მანძილზე მდებარეობს, მოდერნიზებული FP-1 ტიპის უპილოტო საფრენი აპარატებით იერიში მიიტანეს.
„უკრაინის თავდაცვის ძალებმა რუსეთის უმსხვილეს ნავთობგადამამუშავებელ ქარხანას საზღვრიდან 2 500 კილომეტრზე მეტი მანძილიდან, მოდერნიზებული FP-1 ტიპის უპილოტო საფრენი აპარატების გამოყენებით, შეუტიეს“, - ნათქვამია კომპანიის განცხადებაში.
Fire Point-ის ცნობით, ომსკის ნავთობგადამამუშავებელი ქარხანა რუსეთის უმსხვილესია ობიექტია და მას წელიწადში 22.23 მილიონი ტონა ნავთობის გადამუშავება შეუძლია.
უკრაინული დრონების დარტყმის შემდეგ ქარხნის ტერიტორიაზე ხანძარი გაჩნდა.
ასევე, ომსკის ნავთობგადამამუშავებელ ქარხანაზე დარტყმის ფაქტი დაადასტურა უკრაინის შეიარაღებული ძალების გენერალურმა შტაბმაც.
გენშტაბის ინფორმაციით, ქარხანა საწვავის, საპოხი მასალებისა და ნავთობქიმიური პროდუქციის ფართო სპექტრს აწარმოებს. მისი პროდუქციის ნაწილი რუსეთის საოკუპაციო არმიის საჭიროებების დასაკმაყოფილებლად გამოიყენება.
„ასეთი ობიექტების დაზიანება უკრაინის მიერ გაერო-ს წესდების 51-ე მუხლის შესაბამისად, თავდაცვის განუყოფელი უფლების განხორციელებაა და რუსეთის ფედერაციის სამხედრო-ეკონომიკური პოტენციალის შემცირებას ისახავს მიზნად“, - ნათქვამია უკრაინის გენშტაბის განცხადებაში.
