უკრაინის მიერ შორ მანძილზე მოქმედი ოპერაციების შედეგად რუსეთის ნავთობგადამამუშავებელი სიმძლავრეების 51%-ზე მეტი მწყობრიდან არის გამოსული.
ამის შესახებ უკრაინის თავდაცვის მინისტრმა ევჰენი ხმარამ განაცხადა.
„დაზვერვამ, გენერალური შტაბისა და თავდაცვის სამინისტროს ანალიტიკოსებმა შეაფასეს უსაფრთხოებისა და თავდაცვის ძალების მიერ განხორციელებული ბოლო შორ მანძილზე მოქმედი დარტყმების შედეგები. მოწინააღმდეგის სიმძლავრეების ნახევარზე მეტი მწყობრიდან არის გამოყვანილი. ეს არის კარგად გააზრებული, თანმიმდევრული და სისტემური მოქმედებების შედეგი, რომლებიც რუსეთის სამხედრო მანქანის დასუსტებასა და მისი სამხედრო-ეკონომიკური პოტენციალის განადგურებას ისახავს მიზნად“, - განაცხადა ხმარამ.
მისი თქმით, ბოლო პერიოდში დარტყმები განხორციელდა მოსკოვის, იაროსლავლის, კინეფის, უსტ-ლუგის, პერმის, ილსკის, სარატოვის, სიზრანისა და სხვა ნავთობგადამამუშავებელ ქარხნებზე.
„ნავთობგადამამუშავებელი სიმძლავრეების 51%-ის დაზიანება მნიშვნელოვანი დარტყმაა მტრის ეკონომიკისთვის, მისი აგრესიის განხორციელებისა და საკუთარი სამხედრო დაჯგუფებების მომარაგების შესაძლებლობისთვის. ჩვენი შორ მანძილზე მოქმედი დარტყმები ომს რუსეთის ტერიტორიაზე გადააქვს“, - აღნიშნა უკრაინის თავდაცვის მინისტრმა.
ხმარას განცხადებით, თავდაცვის სამინისტროს ერთ-ერთი პრიორიტეტი შორ მანძილზე მოქმედი დამრტყმელი დრონებია, რომლებიც რუსეთის სიღრმეში მდებარე სამიზნეების განადგურების შესაძლებლობას იძლევა.
„წელს მათი წარმოება და შესყიდვები სამჯერ გავზარდეთ. ეს ზღვარი არ არის. მომავალშიც გავზრდით შორ მანძილზე მოქმედი დარტყმების შესაძლებლობებს“, - ნათქვამია ხმარას განცხადებაში.
