რუსეთმა უნგრეთის საელჩოსა და საკონსულოების თანამშრომლების ნაწილი ქვეყნიდან გააძევა - მათ რუსეთის ტერიტორიის დასატოვებლად ორი კვირა მისცეს. ამის შესახებ რუსეთის საგარეო საქმეთა სამინისტრომ განაცხადა.
უწყების ცნობით, 1 -ელ ოქტომბერს რუსეთის საგარეო საქმეთა სამინისტროში უნგრეთის საქმეთა დროებითი რწმუნებული გაბორ გერგიჩი დაიბარეს. მას პროტესტი გამოუცხადეს უნგრეთის ხელისუფლების გადაწყვეტილების გამო, რომლის მიხედვითაც სექტემბერში რუს დიპლომატებს უნგრეთის დატოვება მოსთხოვეს.
რუსეთის საგარეო უწყების განცხადებით, საპასუხო ზომის ფარგლებში რუსეთის ტერიტორიის დატოვება დაევალათ მოსკოვში უნგრეთის საელჩოს, ასევე სანქტ-პეტერბურგსა და ყაზანში უნგრეთის გენერალური საკონსულოების თანამშრომელთა ჯგუფს.
რუსულ მხარეს გაძევებული უნგრელი დიპლომატების ზუსტი რაოდენობა არ დაუსახელებია. მათ ქვეყნის დასატოვებლად ორი კვირა აქვთ.
მოსკოვის გადაწყვეტილება ბუდაპეშტის მიერ 8 სექტემბერს 10 რუსი დიპლომატის გაძევებას მოჰყვა. უნგრეთის ხელისუფლების განცხადებით, ეს პირები ქვეყანაში დიპლომატიური სტატუსისთვის შეუთავსებელ საქმიანობას ეწეოდნენ.
