რუსეთის საოკუპაციო ძალებმა 5 სექტემბრის ღამეს დნიპროპეტროვსკის ოლქის ქალაქ კამენსკოეში სამრეწველო საწარმოს დაარტყეს. თავდასხმას 4 ადამიანი ემსხვერპლა, 5 კი დაშავდა. ინფორმაციას უკრაინული მედია ავრცელებს.
დნიპროპეტროვსკის საოლქო სამხედრო ადმინისტრაციის ხელმძღვანელის, ოლექსანდრ ჰანჟას განცხადებით, დაშავებულთაგან სამი საავადმყოფოშია გადაყვანილი, მათ შორის 30 წლის ქალი რეანიმაციაში იმყოფება.
„კამენსკოეზე რუსების თავდასხმის შედეგად ოთხი ადამიანი დაიღუპა, კიდევ ხუთი დაშავდა. სამი დაშავებული საავადმყოფოში იმყოფება. მათ შორის 30 წლის ქალია, რომელიც რეანიმაციაშია“, – განაცხადა ჰანჟამ.
„უკრაინსკა პრავდას“ წყაროების ინფორმაციით, უკრაინის თავდაცვის ძალების დანაყოფებმა მიიღეს ბრძანება, 5 სექტემბრის 00:00 საათიდან 8 სექტემბრის 23:59 საათამდე ფრონტის ხაზზე „დუმილის რეჟიმი“ დაიცვან. ამის შესახებ გამოცემას სხვადასხვა მიმართულებაზე განლაგებული რამდენიმე ბრიგადის წარმომადგენლებმა და ძალოვან ბლოკში მაღალჩინოსანმა წყარომ განუცხადეს.
გამოცემის ცნობით, საუბარია უკრაინული მხარის შეთავაზებაზე და ამ ინფორმაციის გავრცელების მომენტისთვის შესაბამისი შეთანხმება ჯერ მიღწეული არ ყოფილა. უკრაინის ხელისუფლებას ეს ინფორმაცია ოფიციალურად არ დაუდასტურებია.
ამასთან, 5 სექტემბრის 00:00 საათზე კიევსა და უკრაინის რამდენიმე ოლქში საჰაერო განგაში გამოცხადდა. უკრაინის საჰაერო ძალები კიევის და ხარკივის ოლქებში რეაქტიული დრონების საფრთხის შესახებ იტყობინებოდნენ. კიევში ასევე ისმოდა საჰაერო თავდაცვის სისტემების მუშაობის ხმა.
ინფორმაცია „დუმილის რეჟიმის“ შესახებ ვრცელდება აშშ-ის პრეზიდენტის სპეციალური წარმომადგენლების, სტივ უიტკოფისა და ჯარედ კუშნერის, მოსკოვსა და კიევში დაგეგმილი ვიზიტების ფონზე. 4 სექტემბერს ვოლოდიმირ ზელენსკიმ განაცხადა, რომ მათი ვიზიტის პერიოდში უკრაინული მხარე რუსეთის საჰაერო სივრცის ნორმალურ ფუნქციონირებას უზრუნველყოფს და უკრაინიდან საჰაერო დარტყმები არ განხორციელდება.
