ესტონეთის თავდაცვის მინისტრმა ჰანო პევკურმა თანამდებობიდან გადადგომის გადაწყვეტილება მიიღო. აღნიშნული გადაწყვეტილება უკავშირდება ეროვნული აუდიტის სამსახურის კრიტიკულ დასკვნებს და თავდაცვის სფეროში შესყიდვებთან დაკავშირებულ სკანდალს, მათ შორის უკრაინისთვის განკუთვნილი საბრძოლო მასალის საკითხს. იუწყება ესტონური მედია.
პევკურის განცხადებით, თავდაცვის მინისტრი პასუხისმგებელია მის უწყებას დაქვემდებარებულ მთელ სფეროზე და პოლიტიკურ ლიდერს უნდა ჰქონდეს გამბედაობა და ღირსება, რომ პასუხისმგებლობა საკუთარ თავზე აიღოს, მაშინაც კი, როდესაც პირადი დანაშაული არ აქვს.
„მე ამ პასუხისმგებლობას საკუთარ თავზე ვიღებ, პრემიერ-მინისტრს ახალი თავდაცვის მინისტრის მოძებნა მოუწევს“, - განაცხადა პევკურმა.
მინისტრის თქმით, სახელმწიფო აუდიტის დასკვნები ესტონეთის თავდაცვის ძალებისა და თავდაცვის ინვესტიციების სახელმწიფო ცენტრის საქმიანობის შესახებ იმდენად სერიოზულია, რომ პოლიტიკური პასუხისმგებლობის საკითხი უნდა დადგეს.
პევკურმა აღნიშნა, რომ თანამდებობას მის მემკვიდრეს პრემიერ-მინისტრისთვის მოსახერხებელ დროს გადასცემს. მან ასევე განაცხადა, რომ მტკიცედ არის დარწმუნებული საკუთარ გადაწყვეტილებებში და მიიჩნევს, რომ ესტონეთის თავდაცვისუნარიანობის გასაძლიერებლად სწორი ნაბიჯები გადაიდგა.
„ესტონეთი დღეს იმაზე უკეთ არის დაცული, ვიდრე ოდესმე ყოფილა“, - განაცხადა მან.
განცხადება გადადგომის შესახებ მას შემდეგ გაკეთდა, რაც გავრცელდა ინფორმაცია, რომ ესტონეთი უკრაინისთვის საარტილერიო ჭურვების შესყიდვას ცდილობდა და, ჯამში, ინდურ კომპანიებს 70 მილიონი ევროს წინასწარი გადახდა გადაურიცხა, მიუხედავად იმისა, რომ ამ კომპანიებს მანამდე არც ერთი საბრძოლო მასალა არ ჰქონდათ გაყიდული.
თავდაცვის ინვესტიციების სახელმწიფო ცენტრის ყოფილმა ხელმძღვანელმა მაგნუს-ვალდემარ საარმა განაცხადა, რომ მნიშვნელოვანი გადაწყვეტილებები თავდაცვის სამინისტროს ხელმძღვანელობასთან შეთანხმების გარეშე არ მიიღებოდა. მისი თქმით, კონტრაქტების დეტალების შესახებ, მინისტრის გარდა, ინფორმირებული იყვნენ ყოფილი კანცლერი კუსტი სალმი და მოქმედი კანცლერი კაიმო კუუსკი.
პევკურმა განაცხადა, რომ კონტრაქტები თავად არ წაუკითხავს, თუმცა დაადასტურა, რომ ცენტრმა მას ეს დოკუმენტები მიაწოდა.
„მიუხედავად იმისა, რომ მინისტრი არც წინდებს და არც საბრძოლო მასალას არ ითვლის და კონტრაქტებზე მოლაპარაკებებს არ აწარმოებს, ეროვნული აუდიტის სამსახურის კრიტიკა, რომელიც, პირველ რიგში, თავდაცვის ძალებისა და თავდაცვის ინვესტიციების ცენტრის საქმიანობას ეხება, პოლიტიკური პასუხისმგებლობის საკითხს აყენებს. ამიტომ მიმაჩნია, რომ დღეს სწორია, საკუთარ თავზე ავიღო პოლიტიკური პასუხისმგებლობა თავდაცვის მთელ სფეროზე და თავდაცვის მინისტრის თანამდებობა პრემიერ-მინისტრისთვის მოსახერხებელ დროს გადავაბარო,“ - განაცხადა პევკურმა.
