უნგრეთის ახალი მთავრობა საფრთხედ მიიჩნევს რუსეთს, რომელიც უკვე მეხუთე წელია უკრაინის წინააღმდეგ აგრესიულ ომს აწარმოებს. ამის შესახებ გაერო-ს გენერალური ასამბლეისთვის მომზადებულ დოკუმენტშია ნათქვამი, რომელსაც პრემიერ-მინისტრმა პეტერ მადიარმა ხელი მოაწერა და რომელიც 26 აგვისტოს გამოქვეყნდა.
„უნგრეთი გმობს რუსეთის სამხედრო აგრესიას და სრულად უჭერს მხარს უკრაინის სუვერენიტეტსა და ტერიტორიულ მთლიანობას, საერთაშორისო დონეზე აღიარებულ საზღვრებში“, - ნათქვამია დოკუმენტში, რომელიც სექტემბერში დაგეგმილ გაერო-ს გენერალურ ასამბლეაზე უნგრეთის დელეგაციისთვის ახალ პრინციპებს განსაზღვრავს.
სააგენტო dpa-ს შეფასებით, მოსკოვის აგრესიული ქმედებების დაგმობა უნგრეთის წინა მთავრობის, ვიქტორ ორბანის ხელმძღვანელობით გატარებულ საგარეოპოლიტიკურ კურსთან სრულ გაწყვეტას წარმოადგენს.
უნგრეთის ახალი ხელისუფლება აღიარებს კიევის თავდაცვის უფლებას. „რუსეთის ქმედებები საფრთხეს უქმნის უნგრეთს, ევროპასა და მსოფლიო წესრიგს“, - ნათქვამია დოკუმენტში.
ბუდაპეშტი მხარს უჭერს ყველა ძალისხმევას, რომელიც უკრაინისთვის „მდგრადი მშვიდობისა და გრძელვადიანი უსაფრთხოების გარანტიების“ შესახებ მოლაპარაკებებს შეუწყობს ხელს.
განსაკუთრებით საყურადღებოა, რომ ახალ დოკუმენტში რუსეთის ქმედებები არა მხოლოდ უნგრეთისა და ევროპის, არამედ მსოფლიო წესრიგისთვის საფრთხედ არის შეფასებული. ასევე აღნიშნულია, რომ რუსეთის მოქმედებები სერიოზულ საფრთხეს უქმნის უკრაინის ზაკარპატიის რეგიონში მცხოვრებ უნგრულ უმცირესობას.
ამასთან, ბუდაპეშტის ახალი კურსი ორბანის პოლიტიკასთან სრულ გაწყვეტას ჯერ კიდევ არ ნიშნავს. უნგრეთი კვლავ უარს ამბობს უკრაინისთვის იარაღის მიწოდებაზე და არ უჭერს მხარს კიევის ევროკავშირში დაჩქარებულ გაწევრიანებას. თუმცა რუსეთის პირდაპირ „საფრთხედ“ გამოცხადება და უკრაინის სუვერენიტეტისა და თვითდაცვის უფლების მხარდაჭერა ორბანის პერიოდისგან მკვეთრ ცვლილებაზე მიუთითებს.
