კრივი-რიჰში მაშველები ნანგრევების გაწმენდას და რუსეთის მიერ სავაჭრო ცენტრზე განხორციელებული დარტყმის ადგილზე, ნანგრევებში ადამიანების ძებნას კვლავ აგრძელებენ. ამ დროისთვის ცნობილია 16 დაღუპულისა და 130 დაშავებულის შესახებ.
ამის შესახებ უკრაინის პრეზიდენტი ვოლოდიმირ ზელენსკი წერს.
პრეზიდენტის თქმით, 9 ათასი კვადრატული მეტრის ფართობზე გაჩენილი ხანძარი ლიკვიდირებულია. სამაშველო სამუშაოებში ჩართული არიან უკრაინის საგანგებო სიტუაციების სახელმწიფო სამსახურის სპეციალისტები და კინოლოგიური ჯგუფები.
130 დაშავებულს შორის 23 ბავშვია.
ზელენსკიმ ასევე განაცხადა, რომ საღამოდან მთელი ღამის განმავლობაში რუსეთი უკრაინის მიმართულებით რაკეტებითა და დრონებით დარტყმებს ახორციელებდა.
კიევში ბალისტიკური რაკეტებით განხორციელებული დარტყმების შედეგად დაზიანდა სარკინიგზო ინფრასტრუქტურა. ერთი ადამიანი დაიღუპა, კიდევ ერთი კი დაშავდა.
ზაპოროჟიეში რუსულმა დრონმა მიკროავტობუსს დაარტყა, რის შედეგადაც სამი ადამიანი დაშავდა.
რუსეთის დაბომბვის ქვეშ ასევე მოექცა ოდესის, დნიპროპეტროვსკის, ხარკივის, დონეცკის, სუმის, ხერსონის, ჩერნიჰივისა და მიკოლაივის ოლქები.
"უკრაინაში საჰაერო თავდაცვის საშუალებების დეფიციტი ყოველდღიურად იწვევს მსხვერპლს, რომლის თავიდან აცილებაც შეიძლებოდა. სიცოცხლის დაცვა ყოველდღიურ გადაწყვეტილებებსა და მსოფლიოს ეფექტიან მხარდაჭერას მოითხოვს და ახლა სწორედ ბალისტიკური რაკეტების და სხვა რაკეტების საწინააღმდეგო ახალი რაკეტების მიწოდებას შეუძლია დახმარება.
მადლობა ყველას, ვინც ჩვენს ხალხს ეხმარება და რეალური ნაბიჯებით მხარს უჭერს უკრაინას", - წერს ზელენსკი.
