დროებით ოკუპირებული ქალაქი გორლოვკა დონეცკის ოლქში უკრაინის თავდაცვის ძალების საცეცხლე კონტროლის ქვეშ მოექცა. ინფორმაციას უკრაინული მედია 28-ე ცალკეულ მექანიზირებულ ბრიგადაზე დაყრდნობით ავრცელებს, რომელსაც ზამთრის კამპანიის რაინდების სახელი ეწოდა.
„რაინდმა პილოტებმა გორლოვკა კონტროლის ქვეშ მოაქციეს,“ - ნათქვამია განცხადებაში.
განცხადების თანახმად, 28-ე ბრიგადის, „სპალაჰის“ უპილოტო საფრენი აპარატის ოპერატორები სულ უფრო ხშირად ესხმიან თავს რუსული ხაზების მიღმა არსებულ ლოგისტიკას. სამიზნე ხდება სატვირთო მანქანები, მსუბუქი ავტომობილები, ყველგანმავლები და სხვა სატრანსპორტო საშუალებები , რომლებიც მომარაგების მიზნით გამოიყენება.
„ყველაფერი, რაც დროებით ოკუპირებულ გორლოვკაში შედის, იქვე იწვება,“ - ნათქვამია განცხადებაში.
მიუხედავად იმისა, რომ ქალაქი უკრაინის პოზიციებიდან დაახლოებით 35–40 კილომეტრში მდებარეობს, ბოლო პერიოდში იქ გადაადგილება გაცილებით სახიფათო გახდა.
„თუ ადრე მტერი იქ შედარებით თავისუფლად გადაადგილდებოდა, ახლა მისი ტრანსპორტი რეგულარულად ხდება დარტყმების სამიზნე“, - აცხადებენ სამხედროები.
ბრიგადის შეფასებით, ეს შედეგი არ არის მხოლოდ ახალი საშუალო რადიუსის დრონების ან ოპტიკურ-ბოჭკოვანი სისტემების დამსახურება. მათი თქმით, მთავარი ფაქტორი არის პილოტების გამოცდილება, მოქალაქეების შემოწირულობები და უკრაინული დანაყოფების ერთმანეთთან კოორდინაცია.
