ჩვენ გავაკეთეთ ძალიან მკაფიო განცხადება შეწყალებასთან დაკავშირებით და ზოგადად, პატიმრების მიმართ მიდგომებთან დაკავშირებით. განვაცხადეთ, რომ დანაშაულთან მიმართებით თუ იქნება სინანული, შესაბამისი მიმართვა, მზად ვართ, შესაბამისი რეაგირება იყოს ამ ყველაფერზე, – ამის შესახებ საქართველოს პრემიერ-მინისტრმა, ირაკლი კობახიძემ 4 ოქტომბრის საქმეზე დაკავებულებთან დაკავშირებული კითხვის საპასუხოდ განაცხადა.
როგორც კობახიძემ აღნიშნა, ეს წინადადება სათანადოდ მიიღეს კონკრეტულმა პატიმრებმა.
„მათ შესაბამისად, აღიარეს ჩადენილი დანაშაული და გაფორმდა მათთან საპროცესო შეთანხმება. ძალიან კარგი იქნება, სხვა პატიმრებიც თუ მიბაძავენ ამ ადამიანებს, მათ შორის აღიარების კუთხით, მათ შორის საქართველოს პრეზიდენტისადმი შეწყალებაზე მიმართვის კუთხით. ჩვენ შეგვიძლია, აქედანვე, რა თქმა უნდა, პრეზიდენტთან შეთანხმებით, კიდევ ერთხელ გავცეთ პირობა იმასთან დაკავშირებით, რომ შესაბამისი მიმართვის, აღიარების და სინანულის შემთხვევაში, ხელისუფლებას ექნება შესაბამისი რეაგირება. ეს არის მნიშვნელოვანი დანაშაულის პრევენციისთვის.
გახსოვთ, რომ 2023 წელს იყო სისტემური ძალადობა, სახელმწიფო ინსტიტუტებზე თავდასხმა, მაშინ ერთი პირი იყო მხოლოდ დაკავებული, ისიც შეიწყალა შემდეგ ყოფილმა პრეზიდენტმა. შემდეგ ექვსი პირი იყო დაკავებული, ამან პრევენციული ეფექტი არ იქონია, პირიქით, წაახალისა ახალი ძალადობა. ახალი ძალადობა რომ არ იყოს წახალისებული, მნიშვნელოვანია, სამართალი აღსრულდეს. აღიარება თუ იქნება, რა თქმა უნდა, ჩვენ გვექნება შესაბამისი რეაგირება და ამაზე კიდევ ერთხელ შემიძლია, პირობა დავდო“, – განაცხადა ირაკლი კობახიძემ.
