აშშ-ის სახელმწიფო დეპარტამენტის დელეგაციასთან „კოალიცია ცვლილებისთვის“ ლიდერებმა შეხვედრა გამართეს.
„კოალიცია ცვლილებისთვის“ ერთ-ერთმა ლიდერმა, ზურაბ ჯაფარიძემ შეხვედრის შემდეგ ჟურბალისტებს განუცხადა, რომ „ქართული ოცნების“ პირობებში ამერიკასთან სტრატეგიული პარტნიორობის აღდგენა არარეალისტურია.
„საუბარი იმაზე, რომ „ქართულ ოცნებასა“ და ვაშინგტონს შორის რაღაც ფორმალიზება მოხდეს, საერთოდ არ ყოფილა. საუბარი იყო, რა არის საქართველოს ინტერესები, საუბარი იყო ამ რეგიონსა და ამ ქვეყანაში რა არის ამერიკის ინტერესები. საუბარი იყო იმაზე, როგორ შეიძლება ამ ინტერესების დამთხვევა და გატარება. მაგის წინა პირობა არის, რომ ამ ქვეყანაში უნდა იყოს დემოკრატია, დამოუკიდებელი სასამართლო და კანონის უზენაესობა. როცა საუბარი არის ამერიკის ინტერესებზე, განსაკუთრებით ამ ადმინისტრაციის პირობებში, მეტწილად საუბარია ამერიკის ეკონომიკურ ინტერესებზე, მაგას სჭირდება დამოუკიდებელი სასამართლო, კანონის უზენაესობა, რაც არის ლიბერალური დემოკრატიის საფუძველი, რაც არ გვაქვს. მე მხოლოდ გამიხარდება, რაც მეტი ამერიკული ინტერესი იქნება ამ ქვეყანაში. საქართველოს აღარ აქვს სტრატეგიული პარტნიორობა ამერიკის შეერთებულ შტატებთან. „ქართულ ოცნებას“ ერთადერთი რაც აინტერესებს, არის, რომ რამენაირად ფოტო დადონ, სადაც კობახიძე ან ვიღაც ხელს ართმევს რუბიოს. ამის იქით არანაირი ეკონომიკური ინტერესები, არანაირი დაახლოება ამერიკასთან, არანაირი ამერიკის შემოსვლა ქვეყანაში.
„ქართული ოცნების“ პირობებში ამერიკასთან სტრატეგიული პარტნიორობის აღდგენა, ჩემი აზრით, არის არარეალისტური. ერთადერთი, რაც შეიძლება მოხდეს, არის ის, რომ ხელი ჩამოართვან და ფოტო/ვიდეო გადაიღონ, მაგის იქით, ამერიკას ესენი ამ ქვეყანაში არ შემოუშვებენ. წლები გახარჯეს იმაზე, რომ ეს ქვეყანა იზოლაციაში მოექციათ და ამათ ინტერესში არ შედის ამერიკისა და საქართველოს დაახლოება. ვერც შემოვლენ ამერიკული კომპანიები ამ ქვეყანაში, იმიტომ, რომ ამ ქვეყანაში არ არსებობს დამოუკიდებელი სასამართლო“, - განაცხადა ჯაფარიძემ.
ცნობისათვის, აშშ-ის სახელმწიფო დეპარტამენტის დელეგაცია საქართველოში 24 მაისს ჩამოვიდა. დელეგაციის წევრებს შორის არიან სახელმწიფო მდივნის აპარატის თანაშემწე ჩარლზ იოქი და ევროპისა და ევრაზიის საქმეთა ბიუროს წარმომადგენელი პიტერ ანდრეოლი. აშშ-ის სახელმწიფო დეპარტამენტის დელეგაციის წევრები უკვე შეხვდნენ ოპოზიციის ნაწილს, ხელისუფლების წარმომადგენლებს. ასევე, შეხვედრა გამართეს საპატრიარქოში.
