პენტაგონის პრესსპიკერმა შონ პარნელმა განაცხადა, რომ აშშ-მა ევროპაში განთავსებული საბრძოლო ბრიგადების რაოდენობა ოთხიდან სამამდე შეამცირა.
„ამგვარად, ევროპაში ამ ჯგუფების რაოდენობა 2021 წლის დონეს უბრუნდება. ეს გადაწყვეტილება ევროპაში აშშ-ის სამხედრო ყოფნის გადახედვის მრავალდონიანი და ყოვლისმომცველი პროცესის შედეგია. ამასთან დაკავშირებით, პოლონეთში ამერიკული ძალების განთავსება დროებით გადაიდო, მიუხედავად იმისა, რომ პოლონეთი აშშ-ის სანიმუშო მოკავშირეა“, - განაცხადა პარნელმა.
მისი თქმით, აშშ-ის ომის დეპარტამენტი ევროპაში ამერიკული ძალების საბოლოო განლაგებას დამატებითი ანალიზის საფუძველზე განსაზღვრავს - სტრატეგიული და ოპერატიული საჭიროებების, ასევე მოკავშირეების შესაძლებლობების გათვალისწინებით, რათა მათ ევროპის თავდაცვაში უფრო დიდი წვლილი შეიტანონ.
„ეს ანალიზი მიზნად ისახავს პრეზიდენტ დონალდ ტრამპიის პოლიტიკის -„ამერიკა უპირველეს ყოვლისა“ განხორციელებას ევროპასა და სხვა რეგიონებში, მათ შორის ნატო-ს მოკავშირეების წახალისებით, რომ ევროპის თავდაცვაზე ძირითადი პასუხისმგებლობა თავად აიღონ“, - აღნიშნა პარნელმა.
მან ასევე განაცხადა, რომ აშშ-ის ომის მდივანი პიტ ჰეგსეთი პოლონეთის ვიცე-პრემიერსა და თავდაცვის მინისტრ ვლადისლავ კოსინიაკ-კამიშთან საუბარი გამართა.
„დეპარტამენტი მჭიდრო კონტაქტს შეინარჩუნებს პოლონელ პარტნიორებთან ამ ანალიზის პროცესში, განსაკუთრებით იმისთვის, რომ უზრუნველყოფილი იყოს აშშ-ის ძლიერი სამხედრო ყოფნა პოლონეთში. პოლონეთმა აჩვენა როგორც საკუთარი თავის დაცვის უნარი, ისე ამისთვის საჭირო მტკიცე ნება. ნატო-ს სხვა მოკავშირეებმაც უნდა მიბაძონ ამ მაგალითს“, - განაცხადა მან.
