აშშ-ის სახაზინო დეპარტამენტმა კიდევ ერთი თვით გაახანგრძლივა სანქციებისგან გამონაკლისი რუსეთის ნავთობზე, რომელიც საზღვაო გზით გადაიზიდება, - ამის შესახებ აშშ-ის სახაზინო მდივანმა სკოტ ბესენტმა განაცხადა.
მისი თქმით, ახალი 30-დღიანი ლიცენზია „ყველაზე მოწყვლად ქვეყნებს“ მისცემს შესაძლებლობას დროებით მიიღონ წვდომა რუსულ ნავთობზე, რომელიც ამჟამად ზღვაში ტრანსპორტირდება.
ბესენტმა აღნიშნულის შესახებ სოციალურ ქსელ X-ზე დაწერა და განმარტა, რომ ეს ნაბიჯი მიზნად ისახავს ენერგომომარაგების სტაბილურობის შენარჩუნებას გარკვეული ქვეყნებისათვის.
უწყების განცხადებით, ეს გახანგრძლივება დამატებით მოქნილობას შექმნის და საჭიროების შემთხვევაში კონკრეტული ლიცენზიების გაცემაც გაგრძელდება.
მანამდე სააგენტო Reuters-მა წყაროზე დაყრდნობით გაავრცელა ინფორმაცია, რომ აშშ-ის ლიცენზიის გახანგრძლივების გადაწყვეტილება მას შემდეგ იქნა მიღებული, რაც რამდენიმე ქვეყანამ რუსული ნავთობის შესაძენად დამატებითი დრო მოითხოვა.
აშშ-ის სახაზინო დეპარტამენტის წინა ლიცენზიის მოქმედება, რომელიც ქვეყნებს რუსული ნავთობისა და ნავთობპროდუქტების შეძენის უფლებას აძლევდა, რომლებიც საზღვაო ტანკერებზე იყო დატვირთული, 16 მაისს ამოიწურა.
მანამდე სკოტ ბესენტმა განაცხადა, რომ დოკუმენტის ხელახლა გახანგრძლივებას არ გეგმავდა.
