ზაპოროჟიეს ოლქის ქალაქ სტეპნოგორსკში საკვანძო ლოკაციები უკრაინის უსაფრთხოებისა და თავდაცვის ძალების კონტროლის ქვეშ გადავიდა.
ამის შესახებ უკრაინის თავდაცვის სამინისტროს მთავარი სადაზვერვო სამმართველო იუწყება.
უწყების ინფორმაციით, ოპერაცია სხვა დანაყოფებთან მჭიდრო კოორდინაციაში ჩატარდა. მთავარი სადაზვერვო სამმართველოს სპეციალური დანიშნულების ქვედანაყოფ „არტანის“ მებრძოლებმა რამდენიმე აქტიური შეტევითი ოპერაცია განახორციელეს, რათა ქალაქიდან რუსი ოკუპანტები განედევნათ და სტეპნოგორსკში ვითარება დაესტაბილურებინათ.
თავდაცვის სამინისტროს ცნობით, „არტანის“ მებრძოლების ტექნიკას, რომლითაც ისინი შტურმზე გადაადგილდებოდნენ, რუსული დრონი დაესხა თავს, თუმცა ის გაანადგურეს.
უწყების ინფორმაციით, რთულ ურბანულ პირობებში მიმდინარე ბრძოლების შედეგად რუსი ოკუპანტები გამაგრებული პოზიციებიდან განდევნეს, ხოლო სტეპნოგორსკის საკვანძო ლოკაციები უკრაინის უსაფრთხოებისა და თავდაცვის ძალების კონტროლის ქვეშ გადავიდა.
„არტანის“ მეთაურმა ვიქტორ ტორკოტიუკმა განაცხადა, რომ შტურმი კოორდინირებულად ჩატარდა, აეროდაზვერვისა და ზუსტი ცეცხლის გამოყენებით.
„თითოეული სახლი შემოწმდა როგორც შესაძლო „სიურპრიზების“, ისე ოკუპანტების დარჩენილი ცოცხალი ძალის არსებობაზე. არ გამოვრიცხავთ, რომ მოწინააღმდეგე ქალაქში ხელახლა შეღწევას ეცდება, თუმცა ამისთვის მზად ვართ“, - განაცხადა ტორკოტიუკმა.
