უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის მიერ უკრაინის წინააღმდეგ დაწყებული ომის დასრულებაზე მოლაპარაკებები არ უნდა გადაიდოს მხოლოდ იმის გამო, რომ ირანთან დაკავშირებული კონფლიქტი ჯერ არ დასრულებულა. ამის შესახებ მან ტელეკომპანია CNN-თან ინტერვიუში ისაუბრა.
ვოლოდიმირ ზელენსკიმ აღნიშნა, რომ ირანში მიმდინარე ომმა ყურადღება რუსეთის აგრესიიდან ნაწილობრივ გადაიტანა.
მისი თქმით, რუსკის შემცველია მოსაზრება, თითქოს უკრაინაში ომის დასრულებაზე ძალისხმევის განახლება შეუძლებელია მანამდე, ვიდრე ირანში კონფლიქტი არ დასრულდება.
ზელენსკიმ ასევე აღნიშნა, რომ აშშ-სთან ტექნიკური მოლაპარაკებები კვლავ გრძელდება. თუმცა დაამატა, რომ შეხვედრის შესაძლებლობას ამ ეტაპზე ვერ ხედავს, ვიდრე ირანში მიმდინარე ომის საკითხი არ მოგვარდება.
ვოლოდიმირ ზელენსკიმ განაცხადა, რომ მთავარი პრობლემა ისაა, რომ უკრაინასა და ირანთან დაკავშირებით მოლაპარაკებებს აშშ-ის მხრიდან ერთი და იგივე პირები აწარმოებენ — აშშ-ის პრეზიდენტის სპეციალური წარმომადგენელი სტივ უიტკოფი და ამერიკის ლიდერის სიძე ჯარედ კუშნერი. მისი თქმით, მნიშვნელოვანია, რომ უკრაინა ყურადღების მიღმა არ დარჩეს.
„არ უნდა გვესმოდეს: ‘უკრაინაზე ცოტა მოგვიანებით ვილაპარაკებთ’... "უკრაინის შესახებ ცოტა მოგვიანებით’. უკრაინა უკვე ისეთ უზარმაზარ ტრაგედიას განიცდის, რომ ამ პრობლემის პარალელურად გადაწყვეტის გზა უნდა ვიპოვოთ,“ — განაცხადა ზელენსკიმ.
უკრაინის პრეზიდენტმა ასევე აღნიშნა, რომ ირანში მიმდინარე ომის გამო უკრაინისთვის მნიშვნელოვანი იარაღის გარკვეული სახეობების მიწოდება შეფერხდა. კერძოდ, მან ახსენა საჰაერო თავდაცვის ჩამჭრელი რაკეტები, რომელთა მიღებაც უკრაინას საკმარისი რაოდენობით ვერ ხერხდება, რადგან აშშ-ში მათი წარმოების შესაძლებლობები შეზღუდულია.
