გერმანიის თავდაცვის მინისტრმა ბორის პისტორიუსმა წარადგინა ბუნდესვერის ისტორიაში პირველი სამხედრო სტრატეგია, რომელიც ითვალისწინებს გერმანიის არმიის გაძლიერებას რუსეთიდან მომდინარე საფრთხის ფონზე და მიზნად ისახავს მის ევროპაში ყველაზე ძლიერ არმიად ჩამოყალიბებას. იუწყება Der Spiegel.
სტრატეგიის მიხედვით, პისტორიუსმა შეინარჩუნა შეიარაღებული ძალების მიზნობრივი რაოდენობა — 260 ათასი მოქმედი სამხედრო. მიუხედავად ამისა, სამხედროები ამ რიცხვის გაზრდას მოითხოვდნენ რუსეთის მხრიდან მზარდი საფრთხის გამო.
რეზერვისტების ჩათვლით, შეიარაღებული ძალების საერთო რაოდენობა სულმცირე 460 ათას სამხედროს უნდა შეადგენდეს.
„ჩვენი ამბიცია არის და უნდა იყოს ის, რომ გავხდეთ ევროპაში ყველაზე ძლიერი ჩვეულებრივი არმია,“ — განაცხადა მინისტრმა.
გერმანიის სამხედრო სტრატეგიის მთავარი მიზანი რუსეთის მხრიდან მომდინარე საფრთხეების შეკავებაა.
დოკუმენტში ნათქვამია, რომ რუსეთი ქმნის პირობებს ნატო-ს წევრ სახელმწიფოებზე შესაძლო სამხედრო თავდასხმისთვის.
ბორის პისტორიუსის სტრატეგიაში განსაზღვრულია ამ საფრთხეებთან გამკლავების ძირითადი რეკომენდაციები, მათ შორის შეტევითი და თავდაცვითი შესაძლებლობების განვითარება — განსაკუთრებით კოსმოსში, კიბერსივრცესა და საინფორმაციო სფეროში.
დოკუმენტი ასევე ხაზს უსვამს, რომ რუსეთის საფრთხეების ჰიბრიდული ხასიათის გათვალისწინებით, ბუნდესვერი უნდა თანამშრომლობდეს სახელმწიფოს ძალაუფლების ყველა ინსტრუმენტთან, თუმცა ძირითადი ყურადღება უნდა გაამახვილოს იმ ამოცანებზე, რომლებიც სამხედრო მოქმედებებს საჭიროებს.
გარდა ამისა, სტრატეგიაში აღნიშნულია, რომ გერმანიის შეიარაღებული ძალები მიიღებენ უფრო მეტ შორ მანძილზე მოქმედ მაღალი სიზუსტის იარაღს, მათ შორის თანამედროვე საჰაერო თავდაცვის სისტემებს.
