უკრაინა ყოველდღიურად კონსულტაციებს მართავს პარტნიორ ქვეყნებთან საჰაერო თავდაცვის სისტემების გადაცემის საკითხზე და პარალელურად მუშაობს საკუთარი საჰაერო თავდაცვის სისტემის შექმნის მიმართულებით. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
მისი თქმით, უკრაინა ეტაპობრივად უახლოვდება იმ მდგომარეობას, როდესაც პარტნიორებთან ერთად შეძლებს საჰაერო თავდაცვის სისტემების — მათ შორის რაკეტებისა და შესაბამისი კომპლექსების - წარმოებას.
„ეს არის უკრაინისთვის სტრატეგიული მნიშვნელობის ამოცანა, რომელიც ქვეყანას ათწლეულების განმავლობაში უზრუნველყოფს უსაფრთხოებით. უსაფრთხოების გარანტიებს შორის, რომლებსაც განვიხილავთ, არის შეიარაღების პაკეტები, წარმოების შესაძლებლობების განვითარება, საჭირო ლიცენზიები და ინდუსტრიული ბაზის შექმნა — ეს ძირითადი მიმართულებებია“, — განაცხადა ზელენსკიმ.
მანამდე ცნობილი გახდა, რომ უკრაინა და გერმანია მუშაობენ ბალისტიკური რაკეტების წინააღმდეგ საკუთარი თავდაცვის საშუალებების შექმნაზე. აღინიშნება, რომ Patriot-ის სისტემების დეფიციტის ფონზე განსაკუთრებულ ყურადღებას იპყრობს უკრაინული პროექტი „ფრეია“.
როგორც უკრაინული მედია აღნიშნავს, ეს პროექტი ითვალისწინებს ევროპაში ბალისტიკური ფარის შექმნას.
