აშშ-ის ვიცე-პრეზიდენტმა ჯეი დი ვენსმს განაცხადა, რომ ირანთან მოლაპარაკებებზე, რომელიც პაკისტანში მიმდინარეობდა, მიმდინარეობდა, შეთანხმებას ვერ მიაღწიეს, რადგან ირანულმა მხარემ უარი თქვა ამერიკული პირობების მიღებაზე. იუწყება CNN.
"ჩვენ არაერთი სიღრმისეული დისკუსია გვქონდა ირანელებთან, ეს კარგი ამბავია, მაგრამ ცუდი ამბავი ისაა, რომ შეთანხმებას ვერ მივაღწიეთ და ჩემი აზრით, ეს ბევრად უფრო ცუდია ირანისთვის, ვიდრე – ამერიკის შეერთებული შტატებისთვის.
ასე რომ, აშშ-ში ვბრუნდებით ისე, რომ შეთანხმება მიღწეული არ არის. ჩვენ ძალზე მკაფიოდ გამოვხატეთ, თუ სად გადის ჩვენი წითელი ხაზები, რა მხრივ ვართ მზად, რომ მათი პირობები გავითვალისწინოთ და რა არის ჩვენთვის მიუღებელი. ჩვენ ეს მაქსიმალურად გარკვევით განვმარტეთ და მათ გადაწყვიტეს, არ დათანხმებოდნენ ჩვენს პირობებს", - განაცხადა ვენსმა ისლამაბადში ირანის დელეგაციასთან გამართული მოლაპარაკებების შემდეგ.
„ჩვენ საკმაო დათმობაზე წავედით. პრეზიდენტმა დონალდ ტრამპმა გვითხრა: ‘უნდა ჩახვიდეთ კეთილი განზრახვით და მაქსიმალურად ეცადოთ შეთანხმების მიღწევას’. ჩვენ ასე მოვიქეცით, მაგრამ სამწუხაროდ, ვერანაირ პროგრესს ვერ მივაღწიეთ,“ - აღნიშნა ვენსმა.
ვენსის თქმით, შეთანხმების მიღწევის მთავარი დაბრკოლება იყო ის, რომ ირანმა უარი თქვა ვალდებულების აღებაზე, არ განავითაროს ბირთვული იარაღი. მან ასევე აღნიშნა, რომ აშშ-მა მოლაპარაკებების მაგიდაზე დატოვა „საბოლოო და საუკეთესო შეთავაზება“.
მანამდე აშშ-ის პრეზიდენტმა დონალდ ტრამპმა ჟურნალისტებთან საუბრისას განაცხადა, რომ ირანთან მოლაპარაკებების შედეგი მას არ აღელვებს, რადგან ვაშინგტონი ამ ომში უკვე გამარჯვებულია.
ამავე დროს, ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ირანის წინააღმდეგ სამხედრო კამპანია ჯერ არ დასრულებულა, მიუხედავად იმისა, რომ ისრაელის არმიამ „ისტორიულ შედეგებს“ მიაღწია.
