11 აპრილის ღამეს, რუსეთის კრასნოდარის მხარის ქალაქ კრიმსკში, უპილოტო საფრენი აპარატის ნამსხვრევების ჩამოვარდნის შედეგად ნავთობბაზის ტერიტორიაზე ხანძარი გაჩნდა. ინფორმაციას ადგილობრივი ხელისუფლება ავრცელებს
გავრცელებული ცნობებით, ღამით მომხდარი თავდასხმის შემდეგ გაჩნდა ხანძარი, რომლის ლიკვიდაციაც დილამდე 29 ერთეული ტექნიკის დახმარებით მოხერხდა.
ასევე ვრცელდება ინფორმაცია, რომ უპილოტო საფრენი აპარატის ნამსხვრევებმა დააზიანა მრავალბინიანი საცხოვრებელი სახლები და ერთ-ერთი საწარმოს საწყობი, რასაც ასევე მოჰყვა ხანძარი.
უკრაინული ტელეგრამ-არხების ცნობებით, ღამით კვლავ განხორციელდა დარტყმა კომპანია "ტრანსნეფტის" სადისპეტჩერო სადგურზე, რომელიც რუსეთის ნავთობსადენის სისტემის ნაწილია.
რუსეთის თავდაცვის სამინისტროს მტკიცებით, ჩამოაგდო და გაანეიტრალა 99 უკრაინული უპილოტო საფრენი აპარატი, რომლებიც დაფიქსირდა კრასნოდარის მხარეში, ბელგოროდის, ბრიანსკის, როსტოვის, კალუგის, კურსკის ოლქებში, ასევე ოკუპირებულ ყირიმში და აზოვისა და შავი ზღვის აკვატორიებში.
შეგახსენებთ, 9 აპრილის ღამეს კრასნოდარის მხარე ასევე მასშტაბური დრონებით შეტევის ქვეშ მოექცა, ყველაზე ძლიერი აფეთქებები კი ქალაქ კრიმსკის რაიონში დაფიქსირდა.
