„მინდა, ხალხმა იცოდეს, რომ ეს იყო იმ რევოლუციის დადასტურება, რომელიც სხვადასხვა ევროპული ქვეყნისა და ამერიკული „დიფ სთეითის“ პირდაპირი მხარდაჭერით განხორციელდა - იმ ძალის, რომელიც პრეზიდენტ დონალდ ტრამპის წინააღმდეგაა“, - განაცხადა სერბეთის ყოფილმა პრეზიდენტმა, ალექსანდარ ვუჩიჩმა, საპარლამენტო არჩევნებში მისი პოლიტიკური ბლოკის დამარცხების აღიარებისას.
ვუჩიჩის თქმით, არჩევნებში გამარჯვებული „სტუდენტური სია“ უცხო ძალების დავალებებს ასრულებს და გაზაფხულზე ისინი რუსეთს სანქციებს დაუწესებენ.
„რაც მაწუხებს, არის ის, რომ ამ საარჩევნო კამპანიის დროს არ მომიტყუებიხართ. მარტამდე ან აპრილამდე ისინი რუსეთის ფედერაციას სანქციებს დაუწესებენ. ისინი ყველაფერს გააკეთებენ, რისი თქმაც არ უნდათ თქვენთვის, ყველაფერს, რადგან ვიმეორებ, ისინი მხოლოდ სხვების საქმის შემსრულებლები არიან“, – განაცხადა ვუჩიჩმა.
ვუჩიჩის თქმით, სტუდენტების მიერ მხარდაჭერილი საარჩევნო სიის გამარჯვების მიუხედავად, მისი პოლიტიკური ძალა ბრძოლას გააგრძელებს. მან არჩევნების შედეგები უცხოურ ჩარევას დაუკავშირა, თუმცა ამ ბრალდებების დასადასტურებლად მტკიცებულებები არ წარმოუდგენია.
სერბეთის საზოგადოებრივი მაუწყებლის RTS-ის ცნობით, ვუჩიჩმა განაცხადა, რომ წინასწარი მონაცემებით, "სტუდენტირ სიას" პარლამენტში 135-დან 140-მდე მანდატი ექნება, მის პოლიტიკურ ბლოკს კი - დაახლოებით 105-106.
არჩევნების სადამკვირვებლო ჯგუფის, CRTA -ის ეგზიტპოლის შედეგების მიხედვით, სერბეთის საპარლამენტო არჩევნებში პარტია „სტუდენტური სია“ 51.2 პროცენტით ლიდერობს, ალექსანდრ ვუჩიჩის „სერბეთის პროგრესულ პარტიას“ კი 40.4 პროცენტი აქვს.
საპარლამენტო არჩევნები სერბეთში 25 ოქტომბერს გაიმართა. კენჭისყრას წინ უძღოდა თითქმის ორწლიანი ანტისამთავრობო საპროტესტო აქციები, რომლებიც 2024 წელს ნოვი-სადის რკინიგზის სადგურის გადახურვის ჩამონგრევის შემდეგ დაიწყო. შემთხვევას 16 ადამიანი ემსხვერპლა, მომხდარმა კი კორუფციის შესახებ ბრალდებები და მთავრობის წინააღმდეგ მასშტაბური პროტესტი გამოიწვია.
