სამწუხაროა, რომ ბრიუსელმა საქართველო მტრად გამოაცხადა და ქართველ ხალხს როგორც მტერს, ისე ეკიდება, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

„საქართველოს მიმართ მტრული ნაბიჯების გადადგმის მოლოდინი ყოველთვის გვაქვს. ფაქტია, რომ დღეს, საქართველოს მტრობენ. სამწუხაროა, რომ ბრიუსელმა საქართველო მტრად გამოაცხადა და ქართველ ხალხს როგორც მტერს, ისე ეკიდება. 30-წლიანი თანამშრომლობის პირობებში, როცა საქართველომ პარტნიორობის სრული, ყველა გამოვლინება აჩვენა, მათ შორის სამხედრო მისიებში მონაწილეობით. ევროკავშირის ცენტრალური აფრიკის მისია იყო,  რომელიც ჩაიშალა, რადგან ევროკავშირის არც ერთმა წევრმა ქვეყანამ არ მოინდომა იქ წასვლა, ყველას, თბილად, საკუთარ ოთახებში ყოფნა სურდა და იქ ჩვენ წავედით და ეს მისია ჩავარდნას გადავარჩინეთ. ამას იმით პასუხობენ, რომ ფაქტობრივად, ბრიუსელმა ქართველი ხალხი მტრად გამოაცხადა და როგორც მტერს, ისე გვიგეგმავენ რაღაცებს, აბა, აქედან როგორ დავარტყათ, როგორ გავამწაროთ, ფული როგორ შევიტანოთ შემოდინებით და ა.შ. ამას რომ ვხედავთ, რა თქმა უნდა, ამით საბოლოოდ იმ ნდობას ანადგურებენ, რომელიც ქართველ ხალხს აქვს. ევროკავშირის ელჩმა რაც თქვა, ამით ბრიუსელის მიმართ ქართველი ხალხის ნდობას წერტილი დაუსვა, რადგან პირდაპირ თქვა, რომ მისი მიზანია, საქართველომ ისეთი პოლიტიკა გაატაროს, რითაც ქართველ ხალხს დააზიანებს. შემდეგ, გურიაში, აჭარაში, სამეგრელოში ხალხს ხვდებიან, ვითომ, ევროკავშირმა და ბრიუსელმა ეს გაგიკეთესო. რა ფასი აქვს ამის გაკეთებას, თუ აღმოჩნდა, რომ გაბრაზებული ხარ იმის გამო, რომ საქართველოს თურმე რუსეთში ღვინო შეაქვს და ქვეყანაში რუსული ტურისტი შემოდის, ქვეყანა ეკონომიკურად წინ მიდის? – ევროკავშირის ელჩმა თქვა, რომ იმის გამოა გაბრაზებული და ნაწყენი, რომ მაშინ, როცა ევროკავშირი ზარალს იღებს ომისგან, საქართველო რატომ არ ზარალდება. ეს დღეები სიმბოლური იყო, ოთხი წელია ომის დაწყების და ბევრი რამე გავიგეთ. ვიხსენებთ იმას, თუ როგორ გვითრევდნენ ომში. ვნახეთ, სანქციებს როგორ ითხოვდნენ. უნდათ, რომ საქართველო რუსეთთან ესკალაციაში შევიდეს, რისი ბოლოც ომია“, – განაცხადა პაპუაშვილმა.

მისივე თქმით, საქართველოს ოკუპაციის 105 წლის თავზე ვხედავთ, რომ ბრიუსელი და მისი წარმომადგენელი ქართველ ხალხს უყურებენ, როგორც დაქვემდებარებულ ქვეყანას, რომელმაც მითითებები  უნდა შეასრულოს და თავი დაიზიანოს.

„ბრიუსელი და მისი წარმომადგენელი გვიყურებენ, როგორც დაქვემდებარებულ ქვეყანას, რომელმაც მითითებები  უნდა შეასრულოს და თავი დაიზიანოს, რადგან თავად დალხენილად არ არიან. შურთ, თურმე. აბა, რა გამოდის. როცა საუბრობენ, რომ ევროპა ეკონომიკურად ზიანდება და საქართველო ეკონომიკურად წინ რატომ მიდისო. ევროკავშირი გაჩერდა და ჩვენ ვმოძრაობთ. თქვენ რატომ მოძრაობთო. ევროკავშირის ელჩმა ჩამოთვალა, ჩვენ რუს ტურისტებს არ ვუშვებთ, საწვავის ყიდვას ვამცირებთო, ჩვენთან გაზი და ბენზინი გაძვირდაო, თქვენთან არ იხდიან იმდენს, რამდენსაც ჩვენო. ეს ყველაფერი აჩვენებს, რომ მავნე მიზნებია ქართველი ხალხის მიმართ. ბრიუსელს და მის ელჩს მოვუწოდებ, რომ საქართველოს ნუ უყურებენ, როგორც მტერს, ქართველ ხალხს მტრად ნუ აფასებენ“, – განაცხადა პაპუაშვილმა.