საქართველოს აქვს შვიდპროცენტიანი ეკონომიკური ზრდა, რას არ მივცემდით, რომ ჩვენც ასეთი ეკონომიკური ზრდა გვქონდეს, მინდა, მოგილოცოთ, – ამის შესახებ სლოვაკეთის საგარეო საქმეთა მინისტრმა, იურაი ბლანარმა ქართველ კოლეგასთან, მაკა ბოჭორიშვილთან ერთობლივი პრესკონფერენციისას განაცხადა.

„დღეს ვისაუბრეთ ეკონომიკურ თანამშრომლობაზე. საქართველოს აქვს 7-პროცენტიანი ეკონომიკური ზრდა. რას არ მივცემდით, რომ ჩვენც ასეთი ეკონომიკური ზრდა გვქონდეს. მინდა, მოგილოცოთ ეს. ჩვენ ამიტომ გვინდა, გავაღრმაოთ ჩვენი ეკონომიკური დიპლომატია. ვაპირებთ, ჩვენი ეკონომიკური ატაშეს საქართველოში გამოგზავნას, რომ მან მოიძიოს და გააღრმაოს ეკონომიკური თანამშრომლობა. არსებობს ბევრი სფერო, რომელშიც შეგვიძლია, საქართველოსთვის სასარგებლო ვიყოთ, მაგალითად, მწვანე ენერგიები, ინოვაციები, გამავალი წყლების გაწმენდა. დიდი ხანი არ არის, რაც სლოვაკეთსა და საქართველოს შორის ხელი მოვაწერეთ ხელშეკრულებას ეკონომიკურ თანამშრომლობაზე. ქალბატონ მინისტრთან შევთანხმდით, რომ ვიმუშავებთ ამ საკითხზე.  ჩვენ მოხარული ვიქნებით, რომ დავასრულოთ სხვა შეთანხმებებიც. მინისტრს ვთხოვე, რომ ეს საკითხი მიიყვანოს ბოლომდე. მაგალითად, შეთანხმება ინვესტიციების შესახებ“, – განაცხადა ბლანარმა.