ევროკომისიის გაფართოების საკითხებში კომისრის, მარტა კოსის განცხადებით, მონტენეგრო ევროკავშირში გაწევრიანების პროცესში ყველაზე წინ წასული კანდიდატი ქვეყანაა და გზას ადგას, რომ 2028 წელს ევროკავშირის 28-ე წევრი გახდეს.
მისი თქმით, 2026 წელი გაფართოების პროცესისთვის განსაკუთრებით აქტიური წელია - ბოლო 25 წლის განმავლობაში მიმდინარე წლის პირველ ცხრა თვეში კანდიდატ ქვეყნებთან უფრო მეტი მოლაპარაკების თავი გაიხსნა და დაიხურა, ვიდრე ნებისმიერ სხვა წელს.
მონტენეგროსთან დაკავშირებით კოსმა აღნიშნა, რომ ქვეყანას ტექნიკური მოლაპარაკებების დასრულება წლის ბოლომდე ან 2027 წლის დასაწყისში შეუძლია. თუ პროცესი შეფერხებების გარეშე გაგრძელდება, გაწევრიანების ხელშეკრულება შესაძლოა 2027 წელს გაფორმდეს, ხოლო ევროკავშირის წევრი ქვეყნების მიერ მისი რატიფიცირების შემდეგ მონტენეგრო ევროკავშირს 2028 წელს შეუერთდეს.
მოლდოვაზე საუბრისას ევროკომისარმა ხაზი გაუსვა, რომ ქვეყანამ, მიუხედავად იმისა, რომ ევროკავშირში გაწევრიანების პროცესი დასავლეთ ბალკანეთის ზოგიერთ კანდიდატზე გვიან დაიწყო, მნიშვნელოვანი პროგრესი აჩვენა.
„მოლდოვა ჩემს კლასში საუკეთესო მოსწავლეა“, - განაცხადა კოსმა და აღნიშნა, რომ ქვეყანა რეფორმების განხორციელების კუთხით სულ უფრო მეტ წინსვლას აჩვენებს.
რაც შეეხება უკრაინას, კოსის შეფასებით, ქვეყანა ევროკავშირში გაწევრიანების გზაზე წინსვლას რუსეთის სრულმასშტაბიანი ომის მიუხედავად აგრძელებს.
მარტა კოსის შეფასებები ევროკომისიის 4 ნოემბერს გამოქვეყნებულ გაფართოების ანგარიშსაც ეხმიანება, რომელშიც მონტენეგრო, ალბანეთი, მოლდოვა და უკრაინა ევროკავშირში გაწევრიანების პროცესში ყველაზე წინ წასულ ოთხ კანდიდატ ქვეყნად არიან დასახელებული.
ევროკომისიის 4 ნოემბრის ანგარიშის თანახმად, მონტენეგრომ ამ დროისთვის მოლაპარაკებების 33 თავიდან 21 დროებით დახურა. ევროკომისიის შეფასებით, დარჩენილი თავების დახურვა, წევრი ქვეყნების თანხმობის შემთხვევაში, წლის ბოლომდეა შესაძლებელი. ქვეყანა გაწევრიანების პროცესის დასკვნით ეტაპს უახლოვდება.
მოლდოვამ გასული წლის განმავლობაში ევროკავშირთან მოლაპარაკებების ოთხი მიმართულება გახსნა. ევროკომისიის შეფასებით, ქვეყანამ შეასრულა პირობები დარჩენილი მიმართულებების გასახსნელად და თუ რეფორმების ამჟამინდელ ტემპს შეინარჩუნებს, მოლაპარაკებების დასრულებას 2028 წლის დასაწყისისთვის შეძლებს.
უკრაინამ, რუსეთის ომის მიუხედავად, გასული წლის განმავლობაში მოლაპარაკებების ოთხივე მიმართულება გახსნა და ევროკომისიის შეფასებით, დარჩენილი მიმართულებების გახსნისთვის საჭირო პირობებიც დააკმაყოფილა. ამასთან, ბრიუსელი კიევს მოუწოდებს, დააჩქაროს სასამართლო სისტემის, კანონის უზენაესობისა და კორუფციასთან ბრძოლის მიმართულებით რეფორმები.
Financial Times-ის ცნობით, მოლდოვა ევროკავშირში გაწევრიანების პროცესში უკრაინას რეფორმების ტემპით უსწრებს. ევროკომისიის პროგნოზით, მოლდოვას 2027 წელს მოლაპარაკებების 24 თავის დახურვა შეუძლია, უკრაინას კი - მხოლოდ შვიდის
