საქართველოს საგარეო საქმეთა მინისტრის მოადგილემ, ლაშა დარსალიამ განაცხადა, რომ ეუთოს ე.წ. "მოსკოვის მექანიზმის" ფარგლებში ოდირის წინასწარ დამტკიცებული სიიდან შეირჩა ერთი ექსპერტი, რომელიც უახლოეს პერიოდში საქართველოს ეწვევა. დარსალიას კომენტარს საგარეო უწყების პრესსამსახური ავრცელებს.
„მოგეხსენებათ ეუთოს რამდენიმე ქვეყნის მოთხოვნით ამოქმედდა ე.წ. "მოსკოვის მექანიზმი", შესაბამისად ოდირის წინასწარ დამტკიცებული სიიდან შეირჩა ერთი ექსპერტი, რომელიც ეწვევა საქართველოს უახლოეს პერიოდში", - განაცხადა ლაშა დარსალიამ.
მინისტრის მოადგილის განმარტებით, ქართული მხარე უზრუნველყოფს ექსპერტისთვის საჭირო ინფორმაციის მიწოდებას.
„ქართული მხარის მიერ მისი ვიზიტის ფარგლებში მიწოდებული იქნება ყველა საჭირო ინფორმაცია. დაველოდებით მის მიერ შედგენილ დოკუმენტს და საჭიროების შემთხვევაში გავაკეთებთ დამატებით კომენტარებს." - აღნიშნა მინისტრის მოადგილემ.
ცნობისთვის, ეუთო/ოდირის ინფორმაციით, ეუთო-ს “მოსკოვის მექანიზმის” ექსპერტთა მისიამ საქართველოზე 11 თებერვალს დაიწყო მუშაობა.
