უკრაინის პრეზიდენტი ვოლოდიმირ ზელენსკი არ ფიქრობს, რომ გასულ შაბათ-კვირას ფლორიდაში უკრაინულ და ამერიკულ გუნდებს შორის მოლაპარაკებები ჩიხით დასრულდა.
ზელენსკი ჟურნალისტებთან საუბრისას განაცხადა, რომ ეთანხმება იმ მოსაზრებას, რომ მოლაპარაკებების ბოლო რაუნდის შემდეგ მცირე კომუნიკაცია იყო, როგორც უკრაინის, ისე შეერთებული შტატების მხრიდან.
შეკითხვაზე, ნიშნავს თუ არა ეს სიტუაცია იმას, რომ მოლაპარაკებები ჩიხში შევიდა, ზელენსკიმ უპასუხა: „ჯერჯერობით ჩიხს ვერ ვხედავ. ჩვენ დოკუმენტებზე ვმუშაობთ. არსებობს საკმაოდ ტრივიალური ფრაზა: ბოლო მილი ყველაზე რთულია,“ - განაცხადა ზელენსკიმ.
მან დასძინა, რომ აშშ-ის წარმომადგენლებთან მოლაპარაკებები გრძელდება.
„მე უკვე რამდენჯერმე ვესაუბრე (ეროვნული უშიშროებისა და თავდაცვის საბჭოს მდივან) უმეროვს. ის მუდმივად კონტაქტზეა უიტკოფთან და კუშნერთან... ამიტომ კონტაქტებისას დიდი ენერგიაა, მაგრამ შედეგები აუცილებელია“, - თქვა ზელენსკიმ.
17 იანვარს, უკრაინის დელეგაცია, რომლის შემადგენლობაშიც შედიოდნენ ეროვნული უშიშროებისა და თავდაცვის საბჭოს მდივანი რუსტემ უმეროვი, პრეზიდენტის ადმინისტრაციის უფროსი კირილო ბუდანოვი და საპარლამენტო ფრაქცია „ხალხის მსახურის“ თავმჯდომარე დავით არახამია, ამერიკის შეერთებულ შტატებს ეწვია, რათა ამერიკულ გუნდს შეხვედროდა.
გავრცელებული ინფორმაციით, ფლორიდაში უკრაინული გუნდის ვიზიტის მიზანი იყო ამერიკელ პარტნიორებთან უკრაინის უსაფრთხოებისა და ეკონომიკური კეთილდღეობის გარანტიების შესახებ შეთანხმებების დასრულება.
