თუ ვინმეს სურს ბავშვებისთვის ახალი წლის გაფუჭება, წავიდეს და თბილისის ცენტრში გააპროტესტოს, - ამის შესახებ ე.წ. სამხრეთ ოსეთის დე ფაქტო პრეზიდენტმა ალან გაგლოევმა საქართველოს მოქალაქე თამარ მეარაყიშვილის დაკავებასთან დაკავშირებით განაცხადა.
„მიმდინარეობს გამოძიება და ამ საკითხთან დაკავშირებული ყველა დეტალი საჯაროდ არის ცნობილი. არსებობს ფაქტები და დოკუმენტები, რომლებიც ადასტურებს მის მონაწილეობას მის წინააღმდეგ წაყენებულ ბრალდებებში. თუ ვინმეს სურს ბავშვებისთვის ახალი წლის გაფუჭება, წავიდეს და თბილისის ცენტრში გააპროტესტოს“, - განაცხადა გაგლოევმა.
გაგლოევმა თქვა, რომ მეარაყიშვილი არაერთხელ იყო სისხლისსამართლებრივი დევნის ქვეშ, თუმცა სასამართლოში ყოველთვის იგებდა საქმეებს. თუმცა, ბოლო სამწელიწად-ნახევრის განმავლობაში მისთვის არანაირი სანქცია არ დაუკისრებიათ.
„ის მკვეთრ განცხადებებს აკეთებდა ხელისუფლების წინააღმდეგ, შეურაცხმყოფელი ტერმინების გამოყენებით, რაც სისხლის სამართლის დანაშაულია. თუმცა მასზე ზეწოლის ამოცანა არ არსებობდა და არ იარსებებს. ნებისმიერ სხვა ქვეყანაში სისხლისსამართლებრივ დევნას დაიწყებდნენ“, - აღნიშნა რუსეთის საოკუპაციო რეჟიმის წარმომადგენელმა.
ოკუპირებულ ცხინვალის ე.წ. გენერალური პროკურატურის ინფორმაციით, საქართველოს მოქალაქე, თამარ მეარაყიშვილი ჯაშუშობის ბრალდებით დააკავეს.
ამასთან, სუს-მა განცხადება გაავრცელა, რომელშიც ნათქვამია, რომ „ცხინვალიდან ცხელი ხაზით დაადასტურეს ოკუპირებულ ტერიტორიაზე მუდმივად მცხოვრები საქართველოს მოქალაქის, თამარ მეარაყიშვილის უკანონოდ დაკავების ფაქტი“.
ოკუპირებული ცხინვალის ე.წ. საქალაქო სასამართლომ თამარ მეარაყიშვილს ორთვიანი წინასწარი პატიმრობა მიუსაჯა. მედიის ცნობით, თამარ მეარაყიშვილი ბრალდებებს უარყოფს და შიმშილობას განაგრძობს.
