პოლონეთი გააუქმებს გდანსკში მდებარე რუსეთის ბოლო გენერალური საკონსულოს ნებართვას. ამის შესახებ 19 ნოემბერს პოლონეთის საგარეო საქმეთა მინისტრმა რადოსლავ სიკორსკიმ განაცხადა.
მინიტრის თქმით, გადაწყვეტილება მიღებულია იმის გამო, რომ რუსეთმა არათა შეწყვიტა, არამედ გააძლიერა "პოლონეთზე დივერსიული თავდასხმები".
"როდესაც ჯაშუშობისა და დივერსიის მიზანი ადამიანური მსხვერპლის გამოწვევაა, ჩვენ საქმე გვაქვს არა დივერსიასთან, არამედ სახელმწიფო ტერორიზმთან. ამიტომ, და ეს არ იქნება ჩვენი სრული პასუხი, მე გადავწყვიტე გავაუქმო რუსეთის საკონსულოს გდანსკში ფუნქციონირების ნებართვა", - განაცხადა სიკორსკიმ პოლონეთის სეიმში გამართულ პრესკონფერენციაზე.
სიკორსკის განცხადებით, ოფიციალური ნოტა მოსკოვს უახლოეს რამდენიმე საათში გადაეგზავნება.
მისივე თქმით, პოლონეთში რუსეთის ყველა გენერალური საკონსულოს დახურვის მიუხედავად, ვარშავაში ქვეყნის საელჩო გააგრძელებს ფუნქციონირებას. მან ასევე აღნიშნა, რომ პოლონეთი არ გეგმავს რუსეთთან დიპლომატიური ურთიერთობების გაწყვეტას.
ერთი დღით ადრე, პოლონეთის შინაგან საქმეთა სამინისტროს წარმომადგენელმა განაცხადა, რომ 15-16 ნოემბერს მომხდარი დივერსია, რომელმაც ვარშავა-ლუბლინის რკინიგზის ხაზის მონაკვეთები დააზიანა, შესაძლოა რუსეთის სადაზვერვო სამსახურების მიერ ყოფილიყო განხორციელებული.
პოლონეთის პრემიერ-მინისტრმა დონალდ ტუსკმა აღნიშნა, რომ აფეთქების განხორციელებაში ეჭვმიტანილნი არიან უკრაინის ორი მოქალაქე, რომლებიც რუსეთის სადაზვერვო სამსახურებთან თანამშრომლობდნენ.
რუსეთს პოლონეთში სამი გენერალური საკონსულო ჰქონდა: პოზნანში, კრაკოვსა და გდანსკში. პოზნანის საკონსულო 2024 წლის ნოემბერში დაიხურა. მაშინ ვარშავამ ეს გადაწყვეტილება იმით ახსნა, რომ რუსეთმა "დივერსიის აქტის ჩადენა სცადა". ადგილობრივი მედიის ინფორმაციით, პოლონელმა პროკურორებმა "წარუმატებელი დივერსანტისგან" მიიღეს აღიარება, რომ მან ვროცლავში საღებავების ქარხნის გადაწვა დაგეგმა რუსეთის დაზვერვის სამსახურების მითითებით.
კრაკოვში რუსეთის გენერალური საკონსულოს დახურვის შესახებ კი 2025 წლის მაისში გახდა ცნობილი. გადაწყვეტილება ეფუძნებოდა მტკიცებულებებს, რომ რუსეთის დაზვერვის სამსახურებმა ვარშავაში მერივილსკას სავაჭრო ცენტრზე ცეცხლის წაკიდების ორგანიზება მოახდინეს, რამაც 1400 მაღაზია და მომსახურების ობიექტი მთლიანად გაანადგურა.
